ने. सं. ११४४ कौलाथ्व चौथी -

राजधानी मवःगु जिल्ला आन्दोलित , डोटीइ टियरग्याँस, धनकुटाय् कफ्र्यु, दाङय् बन्द

येँ सरकारं थीथी प्रदेशया अस्थायी राजधानी क्वःछीवं राजधानी जुइ मखंगु थीथी जिल्लाय् विरोध स्वरुप आन्दोलन तच्वया वःगु दु । थःपिनिगु जिल्लाय् राजधानी तये महःगु धासें दाङ, डोटी, धनकुटा, पर्सा व प्रधानमन्त्री शेरबहादुर देउवाया गृहजिल्ला डडेलधुराय् समेत आन्दोलन सुरु याःगु खः । कैलालीइ राजधानी दयेकूगु धासें डडेलधुराय् प्रधानमन्त्रीया पुत्ला समेत च्याकूगु दु । आन्दोलनकारीतय्सं प्रम देउवाया पुत्ला च्याके न्ह्यः शवयात्रा यानाः डडेलधुराया सदरमुकामय् दुगु बस पार्कय् थ्यंके हःगु खः ।

अथेहे डोटीइ नं आन्दोलनकारी व प्रहरी दथुइ ल्वापु जूगु दु । स्थिति निणन्त्रणय् कायेत प्रहरीं ५ सेल टियर ग्याँस कयेकूगु खः । क्षेत्रीय प्रशासन कार्यालय राजपुर न्ह्यःने प्रधानमन्त्री शेरबहादुर देउवाया पुत्ला च्याकेगु झ्वलय् अन निगू पुचःया दथुइ ल्वापु जूगु खः । प्रदर्शनकारीतय्सं प्रम देउवाया च्यानाच्वंगु पुत्ला क्षेत्रीय प्रशासन कार्यालय दुने वांछ्वयेवं प्रहरीं प्रदर्शनकारीतय्त लाठीचार्ज याःगु खः । आन्दोलनकारीतय्सं क्षेत्रीय प्रशासन कार्यालयय् मि तयेगु कुतं यायेवं स्थिति नियन्त्रणय् कायेत प्रहरीं हस्तक्षेप याःगु खः ।

अथेहे धनकुटायात १ नम्बर प्रदेशया अस्थायी राजधानी मदयेकूगु धासें स्थानीय वासिन्दां छगू दर्जन स्वयां अप्वः सरकारी ज्याकू तोडफोड यानाः मि तया बिउगु दु । सरकारी ज्याकू तोडफोड जुइवं स्थानीय प्रशासनं अन अनिश्चितकालीन कफ्र्यु तया बिउगु दु । आक्रोशित भिडं प्रहरी उपरीक्षक सुदीप राजभण्डारीया ना. १ झ १३१४ नम्बरया गाडी तोडफोड याःगु खः । वयां लिपा स्थानीय प्रशासनं म्हिगः ११.४५ बजेनिसें अनिश्चितकालीन कफ्र्यु तया बिउगु खः ।

अन आन्दोलनकारीतय्सं सरकारी ज्याकुथि तःगु मि स्यायेत वःगु दमकल समेत तोडफोड याना बिउगु खः । जिल्ला प्रशासन ज्याकूया कथं आन्दोलनकारीं मालपोत कार्यालय, हुलाक कार्यालय, सिँचाइ डिभिजन कार्यालय, सरकारी वकिलया कार्यालय, उच्च अदालत विराटनगर धनकुटा इजलास तोडफोड याःगु खः । उकथं हे ५ नम्बर प्रदेशया राजधानी दाङयात मदयेकूगु धासें म्हिगः नं दाङ जिल्ला बन्द याःगु दु । दाङ प्रादेशिक सरोकार समितिया नेतृत्वय् जिल्लाया थीथी थासय् स्थानीयवासीं बन्द घोषणा याःगुलिं अन सुथंनिसें ताःहाकः व चीहाकः रुटया गाडी बन्द जूगु दुसा शिक्षण संस्था व कलकारखाना नं पूर्ण रुपं बन्द जूगु दु ।

दाङयात प्रादेशिक राजधानी दयेकेगु निंतिं फुक्कं कथं पाय्छि जूसां नं सरकार व राजनीतिक दलया नेतातय्सं दाङयात तःधंगु अन्याय याःगु धासें सरकारं तत्काल निर्णय मभिंकल धाःसा अनिश्चिकालीन आमहडताल यायेगु ख्याच्वः स्थानीय जनतां बिउगु दु । अथेहे थःपिनिगु जिल्लाय् राजधानी मतःगु धासें पर्सा नं बन्द जुइवं अनया जनजीवन प्रभावित जूगु दु । आन्दोलनकारीतय्सं अनया दुवाः दुवातय् च्वनाः टायर च्याकेगु लिसें यातायात, बजाः, उद्योग, वित्तीय संस्था व शिक्षण संस्था बन्द याःगु दु ।

बन्दं यानाः वीरगञ्जं थीथी जिल्लाय् वनीगु ताःहाकः व चीहाकः रुटया सवारी साधन चले मजुयाः बसपार्कय् सलंसः यात्रुत अलपत्रय् लाःगु दु । बन्दया अवज्ञा याःगु धासें आन्दोलनकारीतय्सं आपालं सवारी साधन नं तोडफोड याःगु दु । उमिसं निगः गाडी, प्यंगः इ–रिक्सा तोडफोड याःगु खः । एम्बुलेन्स, दमकल, पर्यटक, सञ्चार माध्यमया गाडी, मोटरसाइकल, साइकल बाहेकया फुक्कं सवारी साधन बन्द याःगु दुसा होटल व वासः पसः धाःसा चायेके बिउगु दु ।

राजधानी जूथाय् धाःसा दीपावली
राजधानी घोषणा मजूगु जिल्लाय् आन्दोलन जूसां राजधानी घोषणा जूगु नगरय् धाःसा स्थानीय मनूतय्सं मत च्याकाः दीपावली याःगु दु । म्हिगः विराटनगरया थीथी दुवाः व देगलय् मत च्याकाः खुशीयाली न्यायेकूगु खःसा हेटौंडाय् नं स्थानीय राजनीतिक कार्यकर्ता व उद्योगपति व्यापारीतय्सं मत च्याकाः दीपावली याःगु दु ।