एनपिएल ः जनकपुर व चितवन त्यात
किपू (नेपालभाषा टाइम्स)- नेपाल प्रिमियर लिगया सोमवाः जूगु निगू कासाय् जनकपुर बोल्टस व चितवन राइनोज त्याःगु दु । म्हिगः जूगु कासाय् जनकपुर बोल्ट्सं कर्णाली याक्सयात बुकूगु खःसा चितवनं काठमाडौं गुर्खाजयात बुकूगु खः ।
जनकपुरया थ्व निगूगु विजय खः । शनिवाः जूगु उद्घाटन कासाय् विराटनगर किंग्सयात बुकूगु जनकपुर बोल्ट्सं सोमवाः जूगु कासाय् कर्णाली याक्सयात च्यागू विकेटं बुकूगु खः ।
कासाय् न्हापां ब्याटिङ याःगु याक्सं निर्धारित २० ओभरय् १४१ रन दयेकूगु खः । कर्णालीया निंतिं गुलशन झां दकलय् अप्वः ३६ रन दयेकूगु खः । अथेहे अर्जुन घर्तीं ३३ रन, सोमपाल कामीं २९ रन दयेकूगु खः । कासाय् भारतया नांजाःम्ह कासामि शिखर धवन धाःसा १४ रन दयेकाः आउट जूगु खः । बोल्ट्सया निंतिं मोहसिनं निगू विकेट काःगु खःसा ललित राजवंशी, किशोर महतो, जिमी निशन व हर्ष ठाकरें छगू छगू विकेट काःगु खः ।
याक्सं बिउगु १४२ रनया लक्ष्य ज्वना मैदानय् वंगु बोल्ट्सं १५.१ ओभरय् लक्ष्य पूवंकूगु खः । जनकपुर बोल्ट्सया निंतिं अनिलकुमार शाहं अविजित ६२, आसिफ शेख ३६ लाहिरु मिलान्था २४ व जिमी निशन अविजित १६ रन दयेकूगु खः ।
थ्वयां न्ह्यः जूगु कासाय् चितवन राइनोजं काठमाडौ गुखार्जयात न्यागू विकेटं बुकूगु खः । काठमाडांै गुखार्ज बिउगु ११२ रनया लक्ष्य चितवन राइनोजं १७.१ ओभरय् न्यागू विकेटया क्षतिइ पूवंकूगु खः । चितवनया निंतिं सन्तोष कार्कीं दकलय् अप्वः २८ रन दयेकूगु खः । अथेहे लुक बेनेकन्स्टेन २२ रन, शरद भेषावकरं ११ रन, हसन एसाखिल १२ रन, कप्तान कुशल मल्ल व रवि बोपरां ११–११ रन व दीपक बोहरां ७ रन दयेकूगु खः ।
काठमाडौ गुखार्जया निंतिं शाहब आलमं स्वंगू विकेट काःगु खःसा जेहराड इरसमस व ड्यान डाउथं छगू छगू विकेट काःगु खः ।
न्हापां ब्याटिङ याःगु गुखार्जं २० ओभरय् ९ विकेटया क्षतिइ १११ रन दयेकूगु खः । काठमाडौ गुखार्जया निंतिं सुमित महर्जनं दकलय् अप्वः २९ रन दयेकूगु खः । अथेहे माइकल लेभिटं २५, शंकर राणां १६, डयान डाउथवेटं १९ रन दयेकूगु खःसा मेपिं कासामितय्स निगू अकंया रन दयेकेमफुत । राइनोजया निंतिं सोहेल तान्भिरं न्यागू विकेट काःगु खः । अथेहे रिजन ढकाल, कुशल मल्ल, अमरसिंह राउटेल व बेनकेनस्टेनं छगू छगू विकेट काःगु खः ।
मंगलवाः नं लिगय् निगू कासा जुइ । न्हापांगु कासाय् सुदुरपश्चिम रोयल्सं विराटनगर किंग्सलिसे व निगूगु कासाय् चितवन राइनोजं पोखरा एभेन्र्जसलिसे म्हिती ।
LEAVE YOUR COMMENTS