चिकित्सालययात कामपाया भेन्टिलेटर

येँ – येँ महानगरपालिकां छत्रपाटी निःशुल्क चिकित्सालय (महानगरया विशेष कोविड अस्पताल) यात म्हिगः मेगु निगः भेन्टिलेटर बिउगु दु । येँ मनपाया मेयर विद्यासुन्दर शाक्य व उपमेयर हरिप्रभा खड्गी श्रेष्ठं म्हिगः छगू ज्याझ्वःया दथुइ अस्पतालया अध्यक्ष डा. मनोजमान श्रेष्ठयात उगु उपकरण लःल्हानादीगु खः ।
महानगरपालिकां थ्व स्वयां न्ह्यः वंगु जेठ ८ गते भीजी ७० मोडलया निगः भेन्टिलेटर नं चिकित्सालययात बिउगु खः । म्हिगः लःल्हाःगु भेन्टिलेटर महानगरया अनुदानय् अस्पतालं न्याना काःगु खः । जर्मनीइ दयेकूगु थ्व भेन्टिलेटर छगःया २६ लाख ५० द्वः तका तू ।

ज्याझ्वलय् न्ववासें येँ मनपाया मेयर शाक्यं थ्व कोभिडया इलय् न्ह्याथे यानाः नं संक्रमणया ल्याः क्वकायेगु व वासः यायेमाःपिं मनूतय्त गुणस्तरीय सेवा बीगु ज्याय् महानगर केन्द्रित जुयाच्वंगु खँ कनादिल । ज्याझ्वलय् उगु वडाया अध्यक्ष नवीन मानन्धर, अस्पतालया अध्यक्ष डा. मनोजमान श्रेष्ठं नं न्ववानादीगु खः ।

अथे हे म्हिगः हे अरनिको समाजं नं छत्रपाटी चिकित्सालययात करिब २६ लाख ५० द्वः तका तूगु छगः एनेस्थेसिया मेशिन समाजया नायः डा. सर्वोत्तम श्रेष्ठं लःल्हानादिल ।