ख्वपय् धर्मचक्र प्रवर्तन दिवस हन

ख्वप (नेपालभाषा टाइम्स)- धर्मचक्र प्रवर्तन दिवसया लसताय् ख्वपय् भगवान बुद्धया मूर्तियात रथय् तयाः चाःहिकल । भगवान बुद्धं बुद्धत्व प्राप्त याःगु निला लिपा गुरुपुन्हिया न्हि कुन्हु धर्म प्रवर्तन यानाबिज्याःगु खः । वसपोलं गुरु पुन्हि कुन्हु सारनाथय् च्वंग्ु मृगदावनय् न्हापांखुसी न्याम्ह पञ्च भदिय भिक्षुपिंत धर्मोपदेश बियाबिज्याःगु खः । थुकियात हे लुमंकाः गुरुपुन्हि कुन्हु विश्वन्यंकं धर्मचक्र प्रवर्तन दिवस हना वयाच्वंगु दु ।

थ्वहे झ्वलय् बौद्ध संघ भक्तपुरं बुद्ध मूर्तियात रथय् तयाः नगर परिक्रमा याकूगु खः । ज्याझ्वलय् इन्द्रवर्त महाविहार इनाचो गुंला बाजं खलः, क्वनेया गुंला बाजं खलः लिसें भन्ते गुरुमा, अनगारिका, उपासक उपासिकापिनिगु तःधंगु सहभागिता दुगु खः । ज्याझ्वलय् बौद्ध संघ ख्वपया अध्यक्ष त्रिरत्न्न शाक्यं सहभागिपिं लिसें ग्वाहालि यानादीपिंत सुभाय् देछायादीगु खः ।