प्रदेशतय्त नामाकरणया सकस

विवाद जुइ धकाः नां व राजधानीया निर्णय याये ग्यानाच्वन

येँ – देय्या न्हय्गुलिं प्रदेशय् प्रदेश सरकार गठन जूगु खुला पुलेधुंकूसां आः तकं छगू बाहेक मेगु प्रदेशतय्सं थःगु नां व राजधानी तोके याये फुगु मदुनि । प्रदेशया नामाकरण व स्थायी राजधानी तोके यायेगु ज्या लिबाना वंलिसे धमाधम जटिल नं जुया वनीगु सम्भावना ब्वलंगु दु । थुकिया बारे निर्णय जुइवं हे विवाद ब्वलनीगु जुयाः छुं हे प्रदेशतय्सं तुरुन्त निर्णय याये मफयाच्वंगु खँ धाःगु दु ।

प्रदेशया नां निर्धारण यायेत लिबाना वःलिसे थीथी कथंया नां तयेमाः धकाः थीथी कथंयागु हे पुचःत नं सक्रिय जुया वःगुलिं प्रदेश सरकारतय्त थाकुयाच्वंगु खँ सूत्रं धाःगु दु । प्रदेशया नां तयेगु सवालय् थौंकन्हय् दकलय् अप्वः जातीय पहिचान वइगु नां तयेगु लाकि भौगोलिक पहिचानया नां तयेगु धइगु खँय् हे अप्वः वहस जुयाच्वंगु दु । थज्याःगु वहस आः नां तये ल्यं दनिगु फुक्क हे प्रदेशय् जुयाच्वंगु दु ।

राजधानी येँदेय् समेत दुथ्याःगु ३ नम्बर प्रदेशया नां छु तयेगु धइगु खँय् नं प्रदेश संसद दुने धमाधम हे विवाद तब्या जुया वनाच्वंगु खँ सीदुगु दु । थुगु प्रदेशय् अप्वः ल्याखय् दुपिं नेवाः व तामाङ जातिया संगठनतय्सं ‘नेवाः–ताम्सालिङ’ तयेमाः धकाः लबिङ यानाच्वंगु दुसा प्रदेशय् दुपिं थीथी पार्टीया नेवाः सांसदतय्सं ‘नेपालमण्डल’ प्रदेशया लागिं लबिङ यानाच्वंगु दु ।

तर अन राजधानी, नारायणी, पशुपति प्रदेश नां तयेमाः धाइपिं आः धमाधम हावी जुजुं वयाच्वंगु खँ धाःगु दु ।
न्हय्गू प्रदेश मध्ये आः तक कर्णाली प्रदेश छगूया जक नामाकरण जूगु दुसा मेमेगु प्रदेशय् विवाद जारी हे जुयाच्वंगु दनि । नां तयेत संसदया दुई तिहाइ सांसदया समर्थन माः ।

४ नम्बरय् सुझाव मुने सिधल
प्रदेशया नां तयेगु झ्वलय् प्रदेश नं. ४ पाखें आः नकतिनि प्रदेश अन्तर्गत लाःगु ११ गुलिं जिल्लाय् वनाः सुझाव कायेगु ज्या सम्पन्न याःगु दु । थुकी अप्वःस्यां प्रदेशया नां ‘गण्डकी’ तःसा जी धकाः सुझाव बिउगु खँ सार्वजनिक जुइवं म्हिगः हे अनया गुरुङ व मगः आदिवासी जनजातितय्सं छगू ¥याली पिकासें प्रदेशया नां ‘तमुवान–मगरात’ तयेमाः धकाः माग याःगु दु ।

पोखराय् छगू ¥याली पिकासें उमिसं प्रदेश प्रमुखयात छगू ज्ञापनपौ नं लःल्हाःगु दु । ४ नम्बर प्रदेशया संसदपाखें छगू समिति दयेकाः संकलन याःगु सुझावय् ४५ प्रतिशत मनूतय्सं प्रदेशया नां ‘गण्डकी’ तयेमाः धकाः सुझाव बिउगु दुसा ३४ प्रतिशत मनूतय्सं ‘तमुवान–मगरात’ या पक्षय् थःपिनि मत बिउगु दु ।

प्रदेशया राजधानी पोखराय् तयेमाः धाइपिनि प्रतिशत धाःसा यक्व दु । अथे खःसां छुं मनूतय्सं गोर्खाय् राजधानी तयेमाःगु बिचाः नं तःगु दु । यक्व प्रतिशत पोखराया पक्षय् दुगुलिं राजधानीया सवालय् अन समस्या मवइगु खँ धाःगु दु । पोखरायात आः नं प्रदेशया अस्थायी राजधानी दयेकातःगु दु ।