ओम्नी नापया सम्झौता रद्द, हानं मेगू प्रक्रिया न्ह्याकीगु

येँ – स्वास्थ्य तथा जनसंख्या मन्त्रालयं कोरोना भाइरस रोकथाम यायेगु निंतिं स्वास्थ्य उपकरण न्यायेत ओम्नी ग्रुप (ओबीसीआई प्राइभेट लिमिटेड कम्पनी) नाप याःगु सम्झौता रद्द याःगु दु ।

स्वास्थ्य मन्त्रालय नाप जूगु सम्झौता कथं ओम्नी ग्रुपं १० प्रतिशत सामान जक हःगु धासें सम्झौता रद्द याःगु खः । स्वास्थ्य सेवा विभागया महानिर्देशक महेन्द्र श्रेष्ठं बुधवाः पत्रकार सम्मेलनय् रद्द जूगु जानकारी बियादीगु खः । कबोल याःगु कुल ध्यबाया १८ प्रतिशत जकया सामान ओमनीं हःगु धयादिसें महानिर्देशक श्रेष्ठं ल्यँ दुगु सामान हयेत बिहीवाः तकया ई बियागु खःसां छुं प्रतिबद्धता मवगुलिं सम्झौता रद्द यायेमाःगु जानकारी बियादिल ।

‘झीसं ओम्नीनाप यानागु सम्झौता रद्द यानागु दु । सम्झौताया झ्वलय् तःगु ५ करोडया धरौटी जफत यायेगु नापं कालो सूचिइ तयेगु प्रक्रिया नं न्ह्यःने न्ह्याकाःगु दु ।’ महानिर्देशक श्रेष्ठं धयादिल ।

वय्कलं आः न्हूगु प्रक्रिया आव्हान यायेगु जानकारी नं बियादिल । बिहीवाः हे मेमेगू कम्पनीयात सःता सामान न्यायेगु प्रक्रिया न्ह्याकेगु धयादिल ।

वय्कलं कोरोना नियन्त्रण यायेगु निंतिं स्वास्थ्य उपकरण अत्यावश्यक जूगु व छन्हु-निन्हुया दुने हे माःगुलिं बजाः भाः स्वयां २० प्रतिशत अप्व भाः कयाः सम्झौता याःगु स्पष्ट यानादिल । स्वास्थ्य मन्त्रालयं बिना प्रतिस्पर्धाय् अप्व भाः पुला स्वास्थय उपकरण न्याःगु धासें सरकारया आलोचना जुयाच्वंगु खः ।

 

 

सम्बन्धित बुखँ

LEAVE YOUR COMMENTS