न्ह्यानाच्वंगु गाडी दुने बलात्कार

येँ – पूर्वी नेपाःया लहानय् हिन्दी फिल्मय् क्यनीथें न्ह्यानाच्वंगु गाडी दुने हे बलात्कारया घटना जूगु दु । प्रहरी थथे गाडी दुने हे बलात्कार यानावःपिं प्यम्हेसिन ज्वंगु दु । उदयरपुरया त्रियुगा नगरपालिकाया लालपता धाःथासय् आइतबाः बहनी प्रहरीं स्कोर्पियो गाडीइ तयाः बलात्कार याना वःपिंत ज्वंगु खः ।

प्रहरीं सोमवाः सार्वजनिक याःपिं लहानया २४ दँया अमित गुप्ता, २५ दँया सन्देश गुप्ता, २५ दँया विवेक साह व सिरहाया २६ दँया नितेशकुमार शाह खः ।

जिल्ला प्रहरी कार्यालय उदयपुरया प्रमुख नवराज भट्टया कथं उमिसं लहान बजारय् अँ मियाः लिहां वयाच्वंम्ह मिसायात लँ दथुं हे अपहरण यानाः बलात्कार यायां उदयरपुरया त्रियुगा थ्यंके हःगु खः । प्रहरीं बा १४ च ६८१७ गाडी ज्वंबलय् उम्ह मिसा नांगा हे दुगु खँ धाःगु दु ।
उम्ह मिसां धाःकथं अँ मियाः जा नयेत थःगु क्वथाय् वनाच्वंगु इलय् प्यम्ह मिजंतय्सं लँ पनाः जबर्जस्ती गाडीइ तयाः म्हुतुइ चिनाः प्यम्हेसिनं पालंपाः बलात्कार याःगु खः ।