राष्ट्रपतिइ विद्या भण्डारी व कुमारी लक्ष्मी राई दथुइ प्रतिस्पर्धा जुइगु
येँ– राष्ट्रपतिया निंतिं वर्तमान राष्ट्रपति एमालेया विद्या भण्डारी व कांग्रेसया कुमारी लक्ष्मी राई दथुइ प्रतिस्पर्धा जुइगु जूगु दु । एमालें वंगु चान्हय् विद्या भण्डारीयात राष्ट्रपतियात उम्मेदवार दयेकेगु क्वःछिइवं कांग्रेस थौं पुलांम्ह सांसद कुमारी लक्ष्मी राईयात राष्ट्रपतिया उम्मेदवार दयेकेगु क्वःछिउगु खः ।
थ्वयां न्ह्यः कांग्रेसपाखें सांसद मानबहादुर विश्वकर्मायात राष्ट्रपति उम्मेदवार दयेकेगु खँ जुयाच्वंगु खः, तर एमालेपाखें विद्या भण्डारीयात थंगुलिं कांग्रेसं नं मिसाम्ह उम्मेदवार कथं राईयात थनेत्यंगु खः ।
राई निक्वःगु संविधान सभाय् समानुपातिक पाखें सांसद जूम्ह खःसा पुलांम्ह कांग्रेस नेता दिवानसिंह राईया म्ह्याय् खः । दिवान सिंहया पंचायतकालय् हत्या जूगु खः ।
एमालेपाखें झलनाथ खनालं नं राष्ट्रपतिया निंतिं दावी यानाच्वंगु खःसा वंगु चान्हय् च्वंगु स्थायी कमिटीया बैठकं विद्या भण्डारीयात हे हाकनं उम्मेदवार दयेकेगु क्वःछिउगु खः ।
थौं राष्ट्रपतिया निंतिं उम्मेदवारी बिइगु ई खः । थौं राष्ट्रपति विद्या भण्डारी थः हे वनाः उम्मेदवारी बिउवने त्यंगु दु । भण्डारी २०७२ कात्तिक ११ गते राष्ट्रपति जुयादीम्ह खः । न्हूगु संविधान कथं न्हूगु प्रतिनिधि सभा गठन लिपा राष्ट्रपतिया कार्यकाल न्यादँ पूमवंनिसां आः हाकनं राष्ट्रपति चुनाव जुइत्यंगु खः ।
फागनु २९ गते जुइगु राष्ट्रपति चुनावय् भण्डारी हे त्याइगु पक्का धयाथें दु । राष्ट्रपति चुनावय् मतदान याइपिनि बहुमत एमाले व माओवादीया वामगठबन्धनयाके दुगुलिं भण्डारी निक्वःखुसी राष्ट्रपति जुयादी ।
LEAVE YOUR COMMENTS