गोदावरीइ कालिमाटी, बानेश्वर व बल्खुं वइगु तरकारी मी मदइगु

यल – गोदावरी नगरपालिकाय् कालिमाटी, बानेश्वर व बल्खुं वइगु तरकारी व फलफूल मीगु ज्याय् निषेध याःगु दु ।

नगरपालिकाया प्रमुख गजेन्द्र महर्जनं छगू सूचं जारी यासें कोरोना भाइरसया महामारी जुयाच्वंगु इलय् स्वंगू थासं वइगु तरकारी व फलफूल मीगु ज्याय् निषेध याःगु खः । नापं अनं तरकारी व फलफुल हयाः मीगु ज्या याःसा कारवाही यायेगु खँ धाःगु दु ।

कालिमाटी, बानेश्वर व बल्खुइ अप्व धाइथें भारतं तरकारी व फलफुल वइगु व अनं सामान नगरपालिका तक हयेगु इलय् संक्रमणया सम्भावना दइगु धयादिसें नगर प्रमुख महर्जनं थज्याःगु निर्णय अनया व्यवसायीत नापया सहलह लिपा यानागु जानकारी बियादिल । वय्कलं अनं तरकारी व फलफूल हयेगु पलेसा स्थानीय उत्पाडनया बजाः व्यवस्था यायेगु धयादिल ।

अथेहे नगरपालिकाया फुक्क वडाय् अत्यावश्यक खाद्य वस्तु मीगु पसः सुथय् ५ बजे निसें ११ बजे तक जक चायेके दइगु खँ नं नगरपालिकां धाःगु दु ।