चिनियाँ रेलया सर्वेक्षण क्वचाल
येँ -चीनया केरुङंनिसें नेपाःया राजधानी येँय् तक वइगु रेलमार्गया प्रारम्भिक अध्ययन ज्या क्वचाःगु दु । चिनियाँ पुचः व नेपाःया प्राविधिक पुचलं वंगु शुक्रवाः रेलमार्गया प्राविधिक अध्ययन क्वचायेकूगु खः । चिनियाँ पुचलं वइगु अगष्ट महिनाय् प्राविधिक प्रतिवेदन लःल्हाइगु खँ सीदुगु दु ।
प्रधानमन्त्री केपी ओलीया चीन भ्रमणया झ्वलय् उच्च प्राथमिकताय् उगु रेलमार्गयात नं तयेगु कथं तयारी जुयाच्वंगु दु । असारया न्हापांगु वालय् प्रधानमन्त्री केपी ओलीं चीन भ्रमण याइगु ग्वसाः दु । थुगु रेलमार्ग प्राविधिक व लागतया ल्याखं नं तसकं जटिल व खर्चालु जूगुलिं नेपाः थम्हं दयेके मफइगु जुयाः चीनयात हे दयेका बीत इनाप यायेगु तयारी जुयाच्वंगु खँ नं सीदुगु दु ।
थ्व स्वयां न्ह्यः चिनियाँ पुचलं उगु रेलमार्गया स्थलगत अध्ययन याःगु खः । थुगु रेलमार्गया अनुमानित लम्बाइ ७५ किलोमिटर जुइगु खँ धाःगु दु । नेपाः व चीनयात स्वाइगु उगु रेलमार्ग चीनया ल्हासा–सिगात्सेनिसें सीमा लागा केरुङजुयाः नेपाःया रसुवागढी नाकाय् दुहां वइगु कथं डिजायन जुयाच्वंगु दु । उगु रेलमार्गं चिनियाँ नाका केरुङं घौछिया दुने हे येँय् थ्यंके फइगु खँ धाःगु दु ।
थ्व स्वयां न्ह्यः चिनिया सरकारया पूर्ण स्वामित्वय् दुगु चाइना रेल वे इन्टरनेशनल ग्रुपं घौछि स्वयां म्हो इलय् हे येँनं रसुवागढी थ्यनीगु रेलमार्ग दयेका बीगु प्रस्ताव याःगु खः । कम्पनीं रेल विभागयात लःल्हाःगु प्रस्तावय् येँ– रसुवागढी रेल वेया लम्बाई १०५ किलोमिटर जक जुइगु खँ न्ह्यथनातःगु खः । प्रतिघण्टा १२० किलोमिटरया गतिं ब्वाँय् वनीगु थ्व रेलं येँ–रसुवागढी यात्रायात घौछि स्वयां म्हो इलय् थ्यंके फइगु खँ कम्पनीया प्रस्तावय् न्ह्यथनातःगु दु ।
थुगु रेलमार्गया ९० दशमलव २ किलोमिटर ब्व सुरुङ दुने जुइसा ६ दशमलव ५४ किलोमिटर ताँय् चले जुइ । अथेहे ल्यं दुगु ८ दशमलव २६ किलोमिटर जक जमिनय् दइ ।
थुकथं दयेकीगु रेलया थीथी खुगू स्टेशन दइ । थुकिया न्हापांगु स्टेशन रसुवागढी, निगूगु स्याफ्रुबेसी, स्वंगूगु ग्राङय् दयेकेगु कथं रिपोर्ट दयेकातःगु दु । अथेहे प्यंगूगु स्टेशन नुवाकोटया विदुरय्, न्यागूगु स्टेशन ककनीइ दयेकेगु ग्वसाः दुसा लिपांगु स्टेशन येँ दयेकेगु कथं रिपोर्टय् न्ह्यथनातःगु दु । तर सरकारं थ्व प्रस्तावयात स्वीकार मयासे आः ७५ किलोमिटर जक दुगु प्रस्तावयात स्वीकार यायेत्यंगु खँ सीदुगु दु ।
LEAVE YOUR COMMENTS