प्रदेश ३ या थीथी ज्याकू नं चायेका हल

येँ- प्रदेश नं. ३ या सरकारं विषयगत ज्याकू चायेकूगु दु । प्रदेश सरकार गठन जूगु ताःई लिपा प्रदेश सरकार मातहतय् दइगु विषयगत ज्याकू चायेकूगु खः । वंगु आर्थिक दँय् विषयगत ज्याकू मदुगु व स्थानीयस्तरय् नं बिस्कं संरचना मदुगुलिं अन्तरिम बजेट खर्च यायेत तकं समस्या वःगु खःसा आः विषयगत ज्याकू चायेकेवं बजेट कार्यान्वयन यायेत अःपुइगु जूगु दु । नापं प्रदेश दुनेया दक्वं जिल्लाय् सेवा प्रवाह यायेत नं सहज जुइगु विश्वास याःगु दु ।

मुख्यमन्त्री लिसें मन्त्रिपरिषद् ज्याकूया कथं संघीय सरकारं प्रदेश सरकारयात लःल्हाःगु ज्याकू बाहेकं प्रदेशयात अनुकूल जुइकथंया ज्याकू नं चायेकूगु दु । ज्याकूया प्रवक्ता रमेश शिवाकोटीं कनादीकथं प्रदेश ३ या भूगोल, जनसंख्या व उत्पादनयात लिधंसा कयाः ज्याकू चायेकूगु खः ।

भौतिक पूर्वाधार विकास मन्त्रालय अन्तर्गतया इकाइ दकलय् अप्वः दुगु प्रदेशय् जलस्रोत व सिँचाइ डिभिजन ज्याकू, यातायात व्यवस्थापन व सेवा ज्याकू, न्हूगु सहरी आयोजना ज्याकू, सामाजिक विकास मन्त्रालय अन्तर्गत जिल्ला स्वास्थ्य ज्याकू, शिक्षा तालिम केन्द्र, स्वास्थ्य

निर्देशनालय, शिक्षा विकास
निर्देशनालय, व्यावसायिक व सीप विकास तालिम केन्द्र, रोजगार सूचना केन्द्र, सार्वजनिक निर्माण इकाइ, जिल्ला अस्पताल, आयुर्वेद अस्पताल, स्वास्थ्य केन्द्र प्रदेश मातहत संचालनय् हःगु खः ।

अथे हे उद्योग, पर्यटन, वन, वातावरण मन्त्रालय अन्तर्गत उद्योग वाणिज्य व उपभोक्ता हित संरक्षण निर्देशनालय, घरेलु तथा साना उद्योग ज्याकू, वन निर्देशनालय, भू तथा जलाधार व्यवस्थापन ज्याकू, चा व साः परीक्षण प्रयोगशाला, सहकारी प्रशिक्षालय, कृषि व्यवसाय आदि ज्याकू चायेकूगु खः ।