ने. सं. ११४४ कौलाथ्व पारू - नःलास्वनेगु

किपुलिइ तःजिगु सांस्कृतिक ज्याझ्वःया तयारी

किपू – नीलः सांस्कृतिक पुचः १२ दँ क्यंगु लसताय् किपुलिइ तःजिगु सांस्कृतिक ज्याझ्वः याइगु जूगु दु । थ्व हे वइगु गुलांगा पारु (भदौ १) सोमवाःकुन्हु पुचलं किपूया थीथी थासय् सांस्कृतिक व सांगीतिक ज्याझ्वः यायेत्यंगु खः । अथे हे गुंलागा कृष्णाष्टमिकुन्हु किपूया हे पांगा व नगांया थीथी थासय् नं उकथं हे ज्याझ्वः यायेगु तयारी पुचलं यानाच्वंगु दु ।

वज्राचार्य साउन्ड सिस्टम व लाइट स्टेज सर्भिसया ग्वाहालिइ पुचलं उकथंया सांस्कृतिक ज्याझ्वः यायेगु तयारी यानाच्वंगु दु । २०६४ साल मंसिर ५ गते किपू व किपुलिं पिनेच्वंपिं सांगीतिक ख्यःया कलाकारपिं दुथ्याकाः नीस्वंगु नीलः सांस्कृतिक पुचःया नायः तेजमान वज्राचार्यं उगु इलय् खुल्ला रुपं हे छगू सांस्कृतिक ज्याझ्वः यानाः पलिस्था जूगु पुचलं आः १२ दँ क्यनीगु लसताय् लाकाः खुल्ला रुपं हे सांस्कृतिक ज्याझ्वः यायेगु तयारी जुयाच्वंगु जानकारी बियादिल ।

किपुलिइ आतक गबलें नं मजूनि कथंया सांस्कृतिक ज्याझ्वः यायेगु तयारी जुयाच्वंगु धयादिसें वय्कलं ज्याझ्वलय् निम्ह लाखेया प्याखं, थीथी हुलाप्याखं व नेवाः लोकधुनया विशेष प्रस्तुति दइगु नं जानकारी बियादिल । अथे हे ज्याझ्वलय् सूर्यबहादुर महर्जनं छक्वःया पालय् ६० गः थीथी बाजं थाना बिशेष प्रस्तुति बियादीगु ज्याझ्वः किपुलिइ झिगू थासय् व नगां व पांगाय् न्यागू थीथी थासय् ज्याझ्वः यायेगु तयारी जुयाच्वंगु दु ।