बिप्पाया पलेसा भारतलिसे न्हूगु लगानी सम्झौता यायेगु तयारी

येँ – बाबुराम भट्टराई प्रधानमन्त्री कालय् जूगु बिप्पा सम्झौता निष्क्रिय जुइवं भारतं लगानी सम्बन्धी मेगु सन्धिया प्रसताव याःगु दु । थ्व प्रस्तावय् भारत बिप्पाय् स्वयां भचा क्वमिलु जूगु खनेदुगु खँ विज्ञतय्सं धाःगु दु ।

भारतं प्रस्ताव याःगु न्हूगु सन्धीयात कयाः वइगु असोज तकया निंतिं निर्णय यायेगु तयारी जुयाच्वंगु दु । आः भारतं छ्वयाहःगु मस्यौदाय् क्षतिपूर्ति लगायतया विषयय् लचिलो खनेदुगु खँ अधिकारीतय्सं धाःगु दु । भट्टराईया पालय् जूगु लगानी प्रवद्र्धन तथा संरक्षण सम्झौता (बिप्पा)य् दुथ्यानाच्वंगु क्षतिपूर्ति लगायतया खं नेपालय् तसकं विवाद जुयाच्वंगु खः ।

नेपालं आः भारतलिसे थज्याःगु लगानी सम्बन्धी सम्झौता यायेबलय् मेमेगु देय् लिसे नं छगू हे कथं सम्झौता यायेफइ कथं तयारी यानाच्वंगु खँ धाःगु दु । नेपालय् बंगलादेश, कतार, मलेसिया लगायतया देशं लगानी यायेत तयार जुयाच्वंगु दु ।
‘थुगुसी भारतं छ्वयाहःगु मस्यौदा तुलनात्मक रुपं लचिलो खनेदुगु खँ उद्योग वाणिज्य तथा आपूर्ति मन्त्रालयया प्रवक्ता गोपीकृष्ण खनालं धयादीगु दु । वय्कलं बिबिसीलिसे खँ ल्हासें धयादीगु दु ‘भारतं बिप्पाया पलेसा द्विपक्षीय लगानी सन्धि धयागु न्हूगु नां बियाः मस्यौदा छ्वयाहःगु दु । बिप्पाय् लगानी सुरक्षा, क्षतिपूर्ति व समयसीमा लगायतया खँ दुथ्यानाच्वंगु खः । थ्व पालय् थुपिं खँय् निगुलिं पक्षयात सहज जुइकथं मस्यौदा वःगु दु ।’

भारतया लिसें मेमेगु देय्लिसे थ्व सम्झौता यायेफत धाःसा थौंकन्हय् नेपालं फयाच्वंगु व्यापार घाटा म्हो यायेफइगु खँ धाःगु दु । भारतं छ्वयाहःगु मस्यौदायात कयाः असार तकया दुने छु गथे यायेगु धयागु क्वःछिनाः असोज तकया दुने सम्झौताय् हस्ताक्षर यायेगु कथं ज्या जुयाच्वंगु खँ धाःगु दु ।

भारतीय प्रधानमन्त्रीया लिपांगु नेपाः भ्रमणया इलय् ताःई न्ह्यवनिसें ज्यंके मफयाच्वंगु मुद्दा असोज तकया दुने ज्यंकेगु सहमति जूकथं द्विपक्षीय लगानी सन्धिया निंतिं तयारी जूगु खः ।

सम्बन्धित बुखँ

LEAVE YOUR COMMENTS