समस्याग्रस्त सहकारी मर्ज यायेत सर्त

येँ (नेपालभाषा टाइम्स) – येँ महानगरपालिकां समस्याग्रस्त सहकारी संस्थात थवंथवय् स्वायेत (मर्ज यायेत) सर्तत न्ह्यःने हःगु दु । येँ महानगरया सहकारी विभागं येँ महानगर लागा दुने क्षेत्राधिकार जुयाः संचालन जुयाच्वंगु सहकारी संस्थां सहकारी ऐन २०७४या दफा ६६ कथं सहकारी संस्था विघटन व दर्ता खारेज यायेगु सम्बन्धय् सम्बन्धित संस्थाया थीथी सर्त न्ह्यःने हःगु खः ।

विभागयाकथं लगातार निदँ तक गुग नं कारोबार मयासे निष्क्रिय जुयाच्वंगु अवस्था जूसा व साधारण सभाया तत्काल कायम दुगु स्वब्वय् निब्व महुमत दुजःपिनिगु निर्णयपाखें संस्थाया निर्णय यानाः दर्ता खारेजीया स्वीकृतिया निंतिं इच्छुक संस्थां प्रक्रिया न्ह्याके फइ ।

उकिया निंतिं सम्बन्धित संस्थाया लेटर प्याडय् सहकारीया विघटन, दर्ता खारेजी सम्बन्धी निवेदन, वडा ज्याकूपाखें व्यवसाय व छेँया बाः पुलातःगु कर चुक्ताया दसिपौ, साधारणसभापाखें स्वब्वय् निब्व सदस्यं सहकारी विघटन वा दर्ता खारेजीया निर्णयया प्रमाणित प्रतिलिपि, शेयर सदस्यतय् विवरण, त्यासा कयातःपिनिगु विवरण, बचतकर्ताया विवरण, आतकया संचालक समितियया स्वंगू पुस्ताया विवरण व त्यासा लगानी बाहेकं मेमेगु चल अचल सम्पत्तिया विवरण सहकारी विभागय् प्राप्त जूसा जक कानुनी प्रक्रिया न्ह्याकेगु विभागया प्रमुख ध्रुवकुमार काफ्लें जानकारी बियादीगु दु ।