पूँजीवादया उत्थान व पतन

विश्व सर्वहारा वर्गया महान नेता दार्शनिक कार्ल माक्र्सया जन्म जूगु थुगुसी निसः दँ क्यन । थ्व निसःदँया दुने पूँजीवाद वा धनयात महत्व बीगु शासन पद्धतिया आपालं उत्थान जूगु दु । खास याना निसः दँ न्ह्यः कार्ल माक्र्सया जन्म जूगु इलय् तक बांलाक पूँजीवादया विकास नं जूगु मदुनि । अब्लेया समाज सामन्ती समाज हे खः ।

दार्शनिक कार्ल माक्र्सं अब्ले हे तत्कालीन पूँजीवादी व्यवस्थाया व्याख्या जक याःगु मखुसें पूँजीवादया उत्थान, विकास व पतनया तकं सिद्धान्त लिखित रुपं तयार यानावंगु खः । थथे जुइवं पूँजीवादया उन्नति जुइ । उकिं जनतायात दुःख जुइ । अले उकिया बिरोधय् सम्पूर्ण सर्वहारा वर्ग छप्पँ जुयाः न्ह्याः वनधाःसा अवश्य नं उगु पूँजीवादी व्यवस्थाया पतन जुयाः समाजवादी व्यवस्थाया प्रारम्भ जुइ धइगु धु्रवमान्य सिद्धान्तया आविष्कारक खः दार्शनिक कार्ल माक्र्स ।

विश्व सर्वहारा वर्गया महान नेता जर्मनया दार्शनिक कार्ल माक्र्सया थुगु सिद्धान्तयात पाय्छि सछि दँ न्ह्यः सन् १९१७ य् न्हापांखुसि लेनिनं रुस थेंज्याःगु निगू महादेशय् त्यलाच्वंगु विशाल मुलुकय् लागू यानाक्यन । लेनिनं माक्र्सया उगु सिद्धान्त लागू याना क्यनेवं उकियात लेनिनवाद वा भौतिक शास्त्र नापं मिले जूगु तथ्य कथं नालायंकल ।

नेपालय् नं माक्र्सवाद, लेनिनवाद व माओ त्सेतुङ विचारधारायात आत्मसात यायेगु ताः तयाः २००६ सालय् नेपाल कम्युनिष्ट पार्टी नीस्वंगु खः । आः अण्डरलाइन नेपाल कम्युनिष्ट पार्टी तक थ्यंगु इलय् २००६ सालं काःगु लक्ष्य व वर्तमान २०७५ सालं ज्वंगु लँपू स्वयेगु इलय् आकास जमिन पाये धुंकल

न्हापा तक ला थ्व काल्पनिक सिद्धान्त वा कोरा कागज कथं जक कयातःगु सिद्धान्त खः । गुकि छुं ज्यान नं मदु । जर्मनया छुं छगू निगू पुस्तकालयय् जक उगु सिद्धान्त, विचार वा धारणा छाय्पियाच्वंगु खः । उगु हे सिद्धान्तयात ब्यवहारय् लागू याना क्यने धुंकाः जक माक्र्सवादयात लेनिवादनापं नं स्वानाः विश्वय् न्हूगु छगू वाद वा सिद्धान्तया स्थापित जूवन । उकियात माक्र्सवाद, लेनिनवाद कथं नामाकरण याना यंकल । थौं माक्र्सवाद व लेनिनवाद प्रति विश्वया करोडौं जनतां थःपिनि आस्था प्रकट यानाः उकियात परिपालन यानाच्वंगु दु ।

सिद्धान्तय् भचा जक उखें थुखें यायेगु धइगु हिमालयय् सुल्प्याचा म्हिते थें हे खतरा । गथे हिमालयय् सही ढंगं सुल्प्याचा म्हिते मसल धाःसा व भांगराय् स्वतूक्क कुतु वनी । अथेहे विश्व सर्वहारा वर्गया महान नेता दार्शनिक कार्ल माक्र्स, फेडरिक एन्गेल्स व लेनिनं प्रतिवादन यानाः लागू नं याना क्यने धुंकूगु थुगु सिद्धान्त माक्र्सवाद, लेनिवाद व माओ त्सेतुङ विचार सही ढंगं सदुपयोग याये मफुत धाःसा कुईं चले याये मसःम्ह मनूं चले यायेबलय् थःत हे घाः लाइथें उकिं देशयात हे नोक्सान जुइ । थौं खाली नक्कल जक यानाः देश, काल व परिस्थितियात ध्वाथुइकेगु ज्या मस्वःसें माक्र्सवादया नां जपे यानाः उकिया बांलाःगु पक्षयात स्वया नं सही गलत छुं ध्वामथुइकुसें स्वार्थ सिद्ध यायेत पूँजीवादयात च्वन्ह्याकेगु ल्याखं हे जक माक्र्सवादयात उपयोग याइपिसं यानाः देसय् अथे हे जुयाच्वंगु दु ।

नेपालय् नं माक्र्सवाद, लेनिनवाद व माओ त्सेतुङ विचारधारायात आत्मसात यायेगु ताः तयाः २००६ सालय् नेपाल कम्युनिष्ट पार्टी नीस्वंगु खः । आः अण्डरलाइन नेपाल कम्युनिष्ट पार्टी तक थ्यंगु इलय् २००६ सालं काःगु लक्ष्य व वर्तमान २०७५ सालं ज्वंगु लँपु स्वयेगु इलय् आकास जमिन पाये धुंकल । अब्ले थःगु हे हिं सही यानाः पार्टी सदस्यता काइगु खःसा आः हिं सही यानाः शहीद जुइत मखु कि ध्यबां पार्टी सदस्यता न्यानाः हैसियत मदुपिंत क्वत्यला मेपिंत शहीद दयेकाः थः नेता जुइगु ई जुुइधुंकल । थ्व ल्याखं म्हिगः कम्युनिष्ट धायेवं जनताया मिखाय् तःसां हे मध्वइपिं मनू जुइसा थौं कम्युनिष्टया क तकं उच्चारण याःगु स्वये मयये धुुंकल । उकिं कम्युनिष्टतय्गु बेइज्जत यायेगु ल्याखं नीस्वनातःगु गुलिं नां जक कम्युनिष्ट पार्टी छुं नं हालतय् माक्र्सवादी पार्टी जुइमखु । नां छगू जक माक्र्सवाद धक तयाः जनतायात ध्वँ लानाः पूँजीवादी सत्ताय् लिप्त जुइगु मखु । नापं सन् १९१७ य् सोभियत संघ गठन याःम्ह लेनिनया इच्छा नं व मखु ।

माक्र्स असल शिक्षक खःसा माक्र्सवाद धइगु वैज्ञानिक सिद्धान्त खः । उकियात लेनिनं कार्यनीतिइ प्रयोग याना क्यंगुलिं जक लेनिनवाद कथं न्हूगु वाद थें खने दयावल । तर माओ त्सेतुङं थःम्हेसिया हे थःगु छुं नं कथंया न्हूगु वाद मदु । माक्र्सवाद व लेनिनवादया आधारय् हे चिनियाँ भूमिइ पैदल यात्रा सहित चिनियाँ जनजीवन कथं किसान संघर्ष मार्फत् क्रान्तिया लँ ज्वंगु जक खः । तर नेपालय् जन्म जूसां नेपाली भूमिइ मखुसें पिनेया भूमिया आधारय् ज्या यानाच्वंपिं गुलिखे नेपाःया कम्युनिष्टतय्सं धाःसा लेनिनवाद व माक्र्सवाद धाये थें हे न्हूगु वाद कथं माओवाद धकाः पित हयाबिल । थ्व वास्तवय् बिलकूल मिले मजूगु खँ खः । माओ त्सेतुङ स्वयमं जिगु छुं वाद मदु । जि थः हे माक्र्सवादी व लेनिनं प्रतिवादन याःगु लँपुइ न्यसि वनाच्वनाम्ह लेनिनवादी खः धायेकं धायेकं छंगु नं वाद दु धका नेपालय् ब्याख्या यायेगु धइगु ला मूर्ति पूजाया विरोध याःम्ह गौतम बुद्धया मूर्तियात पूजा यायेगु थें हे अदूरदर्शी नीति जक खः ।

माक्र्सवाद धायेगु हे वास्तवय् पूँजीवादया उत्थान, पतनलिसें सम्वन्धित सिद्धान्त खः । द्वन्द्वात्मक भौतिकवादया ज्ञान मदुपिं व स्वार्थया लागिं हे तुरुन्त क्रान्ति यानाः थःपिं सत्ताय् थ्यंकेमाः धाइपिसं माक्र्सवादया इलय् ब्यलय् गलत ब्याख्या नं यायेगु यानाक्यंगु दु । नेपालय् मदन भण्डारीं प्रतिवादन याःगु धयातःगु बहुदलीय जनवाद धाःगु सिद्धान्त नं माक्र्सवादी वा लेनिनवादी जुयाः मखुसें संशोधनवादी जुयाः याकनं पार्टी तःधंकाः पूँजीवादी सत्ताय् जूसां दुहां वनाः आपालं लब नयेगु काइदा जक खः । थ्व ल्याखं थौं सत्ताय् थ्यंपिं एमाले व माओवादी केन्द्रया समीकरणीय पार्टी अन्डरलाइन नेकपाया सिद्धान्त नं नां कम्युनिष्ट खःसां कम्युनिष्ट भावनां प्रेरित जुयाः मखुसें पूँजीवादी धारणां ग्रष्ट जुयाः सत्तारोहण यायेगु काइदा हे जक खः धायेगु इलय् उमित हिस्याये थें भ्या भचा हे च्वनी मखुत जुइ ।

म्हिगः तक एमालेया लाइन खराव जक मखु गलत जुल धकाः स्पष्ट धारणा तयाः एमाले पूँजीवादी पार्टी हे खः धयाजूम्ह प्रचण्ड थः स्वयम एमाले नाप समाहित जूवंगु इलय् एमाले भिना वःगु धायेगु कि माओवादी स्यना वंगु धायेगु ? उकिं कि म्हिगःया खँ गलत खः, कि थौंया लँपू गलत खः धइगु ला निगुलिं पार्टीं महसुस यानाच्वंगु हे जुइमाः । निगूं पाय्छि ला गथे जुइफइ ?