पूर्णता मदयाः भाषा आयोग निष्क्रिय

येँ – प्रदेश सरकार व स्थानीय सरकार वःगु दछिं मल्यायेधुंकाः नं प्रदेश व स्थानीय तहय् सरकारी ज्याखँया भाय् कथं मान्यता बीगु निंतिं भाषाया निर्धारण व सिफारिस जुइफुगु मदुनि । संविधान कार्यान्वयनया निंतिं गठन याःगु भाषा आयोगं हे आःतक पूर्णता कायेमफुनिगुलिं नं भाषा निर्धारण व सिफारिस जुइमफुगु खः ।

भाषा आयोगं सिफारिस मयायेकं भाषाया बारे कानून दयेकेगु व निर्णय याये मफइगुलिं प्रदेश व स्थानीय तहलय् खस नेपाली भाय् बाहेक मेमेगु भाय् छ्यलेगु बारे क्वःछी मफयाच्वंगु खः । सरकारी ज्याखँ कथं मान्यता बीगु भाय् ल्हाःपिं मनूतय् ल्याः, भाषिक म्हसीका, च्वयेगु प्रणाली, भाषिक सवलता व ग्रहणशीलता, ऐतिहासिकता थेंज्याःगु पक्ष स्वयाः आयोगं भाय्या सिफारिस यायेमाःगु खः । तर थज्याःगु पक्षय् सहलह यायेगु निंतिं आयोगया दुजःपिं हे मदुगुलिं भाय् सिफारिस यायेगु ज्याय् अन्योल जुयाच्वंगु खः ।

सरकारं २०७३ भदौ २३ गते डा. लवदेव अवस्थीया अध्यक्षताय् भाषा आयोग गठन याःगु खः । थुकी आःतक दुजःत धाःसा नियुक्त यायेफुगु मदुनि ।

सम्बन्धित बुखँ

LEAVE YOUR COMMENTS