काभ्रेय् जलस्येँया तस्करी बन्द हे जूगु खः ला ?
येँ ÷‘बैंक अफ किड्नी’ धकाः अन्तर्राष्ट्रिय ख्यलय् तकं बदनाम जुयाच्वंगु नेपाःया काभ्रेपलाञ्चोकय् वंगु स्वदँ न्ह्यवंनिसें जलस्येँ तस्करीया समाचार वःगु मदुनि । गुलिस्यां कोरोनाया कारणं अज्याःगु घटना मजूगु अनुमान याःसां कोरोना जुइ स्वयां करिब दछि व झिला न्ह्यवंनिसें अज्याःगु छुं घटना मजूगु खँ धाःगु दु । थुकिं यानाः आः काभ्रेय् जलस्येँ तस्करी बन्द हे जूगु खः ला धकाः नं न्यना हःगु दु ।
वंगु वि.सं. २०७५ जेठ १० गते भ्वँत गिरीगाउँया २९ दँ दुम्ह कुमार गिरीयात तस्करतय्सं झंगः लानाः वयागु जलस्येँ लिकयाः ख्वपया ५१ दँ दुम्ह थर्कबहादुर बस्नेतयात मानव अङ्ग प्रत्यारोपण केन्द्र ख्वपय् प्रत्यारोपण याना बिल । थुकिं यानाः जिल्लाय् जलस्येँ तस्करी याइपिं हानं सक्रिय जुल लाकि छु धकाः शंका याना हल । थ्व स्वयां न्ह्यः २०७१ फागुनय् नमोबुद्ध नपा–२ या निम्ह मचाया मां जुइधुंकूम्ह छम्ह ३५ दँया मिसां विदेश वंम्ह थः भाःतं कयातःगु त्यासा पुलेत तस्कर मार्फत स्वंगू लाख तकां थःगु जलस्येँ मिउगु खँ पिहां वःगु खः ।
घटनाक्रम स्वयेबलय् अन वंगु निदँया दुने नं जलस्येँ मीगु घटना म्हो जूगु खने मंत । घटना जूसां सार्वजनिक मजूगु नं जुइफु धकाः मानव अङ्ग बेचबिखन विरुद्ध चेतनामूलक कार्यक्रम न्ह्याका वयाच्वंगु जनअधिकार संरक्षण मञ्च (पिपीआरं) धाःगु दु । कोरोना सन्त्रासं यानाः थ्व ज्या दिनाच्वंगु अनुमान नं याःगु दु ।
काभे्रपलाञ्चोकया तत्कालीन होक्से व ज्याम्दी गाविसय् २५ दँ न्ह्यवंनिसें मिर्गाैला तस्करी जुया वयाच्वंगु खः । अन छखा हे छेँया न्हय्म्हेस्यां तक जलस्येँ मियाःलि लिपा गां हे त्वःतावंगु घटनात दु । वयां लिपा जलस्येँ मीपिं अप्वया वँसेंलि प्रहरीं वि.सं. २०७० वैशाखय् झिम्ह जलस्येँ तस्करतय्त ज्वनाः कानुनी कारवाही याःगु खः ।
अन जलस्येँ मीपिं मनूतय्सं जलस्येँ लिकायेत चिरे याइबलय् म्हय् जुइगु घाः मेपिंसं खनी धकाः न्ह्याबलें म्ह त्वपुयाः जक म्वः ल्हुइगु याइगु खः । जलस्येँ मियाः वःगु ध्यबा नं अप्वःसिनं अय्लाः, थ्वँ त्वनाः सिधयेकेगु यानाच्वंगु लूगु दु । लिपांगु इलय् धाःसा न्हापा न्हापा जलस्येँ मिउपिं मनूत हे सचेतना अभियानय् सक्रिय जुयाच्वंगु खनेदु । अन जलस्येँ मीपिं मध्ये मिजं स्वयां मिसाया ल्याः स्वदुगं अप्वः खनेदु । (रासस)
LEAVE YOUR COMMENTS