यलय् लिच्छवि जुजु अंशुवर्माकालीन शिलापत्र लुल

यल- थनया मंगलय् भिंद्यःया देगः न्ह्यःने धः दयेकेत गाः म्हूगु इलय् छगू लिच्छविकालीन अभिलेख लुया वःगु दु । यल लाय्कूया सुवर्ण झ्याः क्वसं खुगू फिट तजाःगु उगु अभिलेख लूगु खः । पुरातत्वविद् प्रकाश दर्नालया पुचलं थ्व अभिलेख लुइकूगु खँ धाःगु दु ।

संवत् ५३६ (वि.सं. ६७०) अंकित यानातःगु थ्व अभिलेख लिच्छवि जुजु अंशुवर्माया ईयागु खः । थ्व अभिलेख आः तक सुनानं मब्वंनिगु जूगुलिं थुकियात ब्वने फत धाःसा थुकिं नेपाःया प्राचीन इतिहासया मेगु छुं न्हूगु खँ पिहां वये फइगु अनुमान याना हःगु दु ।
थ्व अभिलेख येँया गोकर्णस्थित बालुवा गांया महत्वपूर्ण अभिलेखया हे समकालीन जूगु खँ धाःगु दु ।

वंगु मंसिर २९ गते धः म्हुइगु झ्वलय् जमिनया १० फिट ति क्वय् गर्भ दुने उगु शिलापत्र लूगु खः । अभिलेखय् सिमेन्ट किनाच्वंगुलिं बांलाक ब्वने थाकुगु खँ धाःगु दु । पुरातत्व विभागं थ्व अभिलेख मेपिंत ब्वंके मबिउगु व थःपिंसं नं ब्वनेगु कुतः मयाःगु द्वपं इतिहासय् रुची दुपिं अनुसन्धातातय्सं बिउगु दु । थ्व शिलापत्र लिच्छवि लिपि व पौढ संस्कृत भाषां च्वयातःगु दु । करिब ६ फिट तजाःगु थ्व शिलापत्रया ८५ सेन्टिमिटर लम्बाइ व ५२ सेन्टिमिटर चौडाइ दुने आखः च्वयातःगु दु ।

लुयावःगु अभिलेखय् महासामन्त अंशुवर्माया नां उल्लेख जुयाच्वंगु दु । थुकी योङ्ग्राम व लिपांगु झ्वलय् ‘संवत् ५३६ ज्येष्ठ मासे शुक्ल पक्षे’ धइगु वाक्य धाःसा स्पष्ट रुपं ब्वनेफु । अभिलेख ब्वनेबलय् उकी कुमारामात्य चन्द्रदूतया नां लिसें जुजु वृषदेवं (लिच्छवि जुजु मानदेवया बाज्या) अन विहार दयेकूगु धकाः च्वयातःगु खँ नं सीदुगु खँ शिलापत्र स्वयेधुंकूपिं इतिहासकारतय्सं धाःगु दु । स्थानीय मनूतय्सं शिलापत्र लुया वःगु जःखःया थाय् नं उत्खनन् यायेमाः धकाः माग याना हःगु दु ।

सम्बन्धित बुखँ

LEAVE YOUR COMMENTS