भिक्षु अश्वघोष महास्थविर मंत

येँ- संघनायक भिक्षु अश्वघोष महास्थविर थौं शुक्रवाः न्हिनय् मंत । तोखाया ग्राण्डी अस्पतालय् भर्ना वासः याकातःम्ह वसपोल शुक्रवाः न्हिनसिया १.३० बजे मदुगु घोषणा चिकित्सकतय्सं याःगु खः । ९३ दँ दुम्ह वसपोल नेपाःया आः दुपिं मध्ये दकलय् ज्याथम्ह भन्ते खः ।
अखिल नेपाल भिक्षु महासंघया महासचिव भिक्षु कोण्डन्य महास्थविरं जानकारी यानाबिज्याः कथं आः वसपोलया पार्थिव शरीरयात येँया धल्कोस्थित संघाराम विहारय् यंकीगु जूगु दु । लिसें वसपोलप्रति अन्तिम श्रद्धाञ्जली प्वंकेगु लिसें थीथी धार्मिक ज्या वहे विहारय् जुइगु खँ नं धाःगु दु ।

अन्तिम संस्कार सम्बन्धी ज्याझ्वः बारे लिपा जक जानकारी वइगु खँ नं वसपोलं कनाबिज्याःगु दु ।

नेपालय् थेरवादी बुद्धधर्म पलिस्था यायेगु ज्याय् आपालं योगदान दुम्ह वसपोल भिक्षु अश्वघोष महास्थविरं नेपालभाषा व खस नेपाली भासं समेत यानाः करिब १०० गू सफू च्वयाबिज्याःगु दु । वसपोल बौद्ध पत्रिका ‘आनन्दभूमि’ व ‘धर्मकीर्ति’ सम्पादक नं खः ।

देशय् बहुदलीय व्यवस्था पुनस्र्थापना जुइधुंकाः तत्कालीन एमालेपाखें वसपोल राष्ट्रिय सभाया सांसद नं जुयाबिज्याःगु खःसा छगू ई लुम्बिनी विकास कोषया कोषाध्यक्ष नं जुयाबिज्याःगु खः ।

नेपाल संवत् १०४७ तछलाथ्व १३ कुन्हु बौ चन्द्रज्योति शाक्य व मां लक्ष्मीमाया शाक्यया कोखं यलय् वसपोलया जन्म जूगु खः । वसपोलया गृहस्थी नां बुद्धरत्न शाक्य खः । वंगु लछि न्ह्यवंनिसें वसपोल उसाँय् मदयाः अस्पतालय् वासः याकाच्वनाबिज्याःगु खः ।