स्वनिगलय् आप्रवासनं हःगु मेगु संकट – प्रहरी पाः तयाः सी उइ माल

येँ – नेवाःतय् आदिभूमि जुयाच्वंगु स्वनिगः दुने पिनें वयाः च्वनाच्वंपिं आप्रवासीतय्सं थीथी कथंया समस्या पिकयाच्वन धइगु चर्चा ला न्हापा नं जुया वयाच्वंगु हे खः । तर आः वयाः थ्व समस्या गुलि तःधं जुल धायेबलय् स्वनिगःया स्थानीय नेवाःतय् परम्परागत दिपय् सी उइगु ज्याय् तकं अवरोध पिकायेगु सुरु याना हःगु दु । थज्याःगु हे अवरोधया कारणं म्हीग थनया चाबहिली च्वंगु छगू दिपय् छम्ह स्थानीय नेवाःया अन्तिम संस्कार तकं दंगा प्रहरी पाः तयाः सम्पन्न याये माःगु अवस्था जुया बिल ।

थौंकन्हय् ओम अस्पतालया ठिक्क लिउने च्वंगु उगु परम्परागत दिपया जःखः थौंकन्हय् पिनें वयाच्वंपिं मनूतय्सं छेँ दनाः वस्ती हे दयेकेधुंकूगु दु । अन च्वंगु परम्परागत दिप थौंकन्हय् वस्तीया दथुइ धइथें लानाच्वंगु दु । न्हापा न्हापा अन न्हय्गू दिप दु धाइगु खः । थौंकन्हय् निगू जक ल्यं दनि । उकी मध्ये छगू स्थानीय चारुमति विहारलिसे आवद्ध शाक्यतय्गु खःसा मेगु छगू स्थानीय डंगोलतय्गु खः । सी उइबलय् थःपित समस्या जुल धकाः छुं ई न्ह्यवंनिसें अन छेँ दुपिं मनूतय्सं पं वयेगु यानाच्वंगु खः ।

म्हीग नं न्हिनय् अन स्थानीय शाक्य परिवारया जः मदुम्ह मय्जु कान्छीमाया शाक्यया अन्तिम संस्कार यायेत हयेत्यंबलय् अन छेँ दुपिंसं सी उइके बी मखु धकाः पनेगु कुतः याःगु खः । उमिसं अन सिँयागु दिप तकं तयेके मबीगु कुतः याःगु खः । गुथियारतय्सं वडा कार्यालययात स्वापू तयाः थःपिनि अन्तिम संस्कार पनेगु कुतः जुयाच्वंगुलिं सुरक्षा बी माल धकाः इनाप याना छ्वत । वयां लिपा दंगा प्रहरी वयाः दिप हे घेरे याना बिल । प्रहरीं घेरे याकाः अन्तिम संस्कार यायेगु ज्या जुल । सुरुइ यक्व हे संख्याय् प्रहरी वःगु खःसां प्यम्ह प्रहरी धाःसा सी उइ सिमधःतले हे पाः च्वना बिउगु खः ।

सम्बद्ध पीडित छेँजःपिंसं धाः कथं अन प्रहरी मवःगु जूसा ल्वापु हे याये मालीगु अवस्था वइगु खः ।म्हीग उमिगु कुतःयात सम्बद्ध गुथियार लिसें अन हे दिप दुपिं डंगोलतय्सं नं प्रतिकार याना बिउगु खः । चारुमति विहारया गुथियार निरेश शाक्यं ‘नेपालभाषा टाइम्स’ यात कनादी कथं थ्व स्वयां न्ह्यः छक्वः नं अन सी उइगु पना बीवं ल्वापु जुइधुंकूगु दु । उगु इलय् उपिंलिसे अप्पां कयेकाः ल्वापु यायेमाःगु अवस्था वःगु खः । थ्वयां लिपा नं इलय् ब्यलय् पनेगु ज्या जूसां लिपा छगू सहमति यानाः सी उइधुंकाः बांलाक सफा याना थकेगु धकाः खँ जूगु खः ।

तर वंगु छुं ई थुखे पिनें हयातःपिं गुण्डा प्रयोग यानाः सी उइगु ज्या पनेगु कुतः जुयाच्वंगु सीदुगु दु ।आः वडापाखें थ्वहे माघ १३ गते निगुलिं पक्ष सःताः थ्व बारे वार्ता याकेत्यंगु खँ सीदुगु दु । थुगु दिप दुगु थाय् न्हापा सुनसान हे खःसां लिपा पिनें वःपिं मनूतय्सं दंक जग्गा न्यानाः खुल्ला लागा समेत अतिक्रमण यानाः छेँ दना हःगु व आः वयाः दिपयात हे अनं चीकेत स्वयाच्वंगु खँ धाःगु दु ।