ने. सं. ११४४ ञलाथ्व दशमी -

सप्तपाताल पुखुली छेँ मदनेत स्कूलयात आदेश

यल – थनया लगंख्यलं दक्षिणपाखे च्वंगु सप्तपाताल पुखुली आः छुं नं कथंया निर्माण ज्या मयायेत यल महानगरपालिकां निर्देशन बिउगु दु । पुुखू म्हासे यानाः अन सटर तयाः पसःकवः पिकायेगुत्यंगु विरुद्ध स्थानीय जनतां महानगरपालिकाय् निवेदन बीवं तत्काल अन छुं नं कथं निर्माण कार्य मयायेत मनपां लिखित निर्देशन बिउगु खः ।

मनपाया मेयर चिरिबाबु महर्जनं ‘नेपालभाषा टाइम्स’ लिसे खँ ल्हासें उगु ऐतिहासिक पुखूया संरक्षण यायेमाः धकाः न्हापा सर्वोच्च अदालतं नं पुखू संरक्षण यायेगु निंतिं आदेश बीधुंकूगु खँ कनादिल । वय्कलं धयादी, ‘न्हापा स्थानीय जनप्रतिनिधि मदुगु इलय् नमूना मच्छिन्द्र माध्यमिक विद्यालयं उगु पुखूया भोग चलन अधिकार कयाहःगु खःसां लिपा अन नीनिगू सटर दुगु भवन दयेकेगु ज्या जुइवं स्थानीय जनतां सर्वोच्च अदालतय् मुद्दा तःगु खः । उगु मुद्दायात कयाः सर्वोच्चं तत्काल ऐतिहासिक सांस्कृतिक पुखूयात संरक्षण यायेगु आदेश बिसें छेँ दयेकेगु ज्या दिकेत आदेश बिउगु खःसा अन दयेकेधुंकूगु संरचना नं थुनाछ्वःगु खः ।’

सर्वोच्च अदालतं आदेश बीगु झ्वलय् कित्ता नम्बर ११२ या उगु जग्गाय् ‘यल उपमहानगरपालिकाया भवन निर्माण अनुमति व नक्सा पास प्रक्रिया त्रुटिपूर्ण खनेदुुगुलिं उत्प्रेषणया आदेशपाखें बदर जुइ’ धकाः आदेश बियातःगु दु ।
उगु इलय् नक्सा पास नं जनप्रतिनिधि मदुगु इलय् जूगु खँ कनादिसें मेयर महर्जनं उकियात भिंकेगु ज्या आः मनपां याइगु जानकारी नं बियादिल ।

वय्कलं कनादी कथं २०७२ वैशाख १२ गते तःभुखाय् ब्वयेधुंकाः स्कुलया भवन स्यंगु व उकियात पुनर्निर्माण यायेगु निंतिं विदेशी दाताया ग्वाहालिं स्कुल दयेकेत अनुमति काःगु खःसा स्कुल दयेकेगु नामय् हानं पुखू म्हासे यायेगु ज्या जूगुलिं उकियात मनपां पनेगु ज्या जूगु खः ।
वय्कलं पुखू ऐतिहासिक महत्वया जूगुलिं उकियात म्हासे याये मजिउगु खँ नं कनादीगु दु । बुंगद्यःया जात्रा क्वचायेवं मत्स्यलोक व पातालय् बुंगद्यःया जात्रा बांलाक क्वचाल धकाः सन्देश छ्वयेमाःगु पुखू जूगुलिं उकिया संरक्षण यायेमाःगु खँ नं वय्कल कनादिल ।

मेयर महर्जनं कनादी कथं बुंगद्यःया जात्रा क्वचायेधुंकाः छन्हु पुखुली तःजिगु पुजा यानाः स्वर्गलोकय् जात्रा क्वचाःगु सन्देश बीत छज्वः चखुं सर्गतय् ब्वयेकेगु याइसा पाताललोकय् सन्देश छ्वयेगु निंतिं उगु पुखुली न्या त्वःतेगु याइ । वय्कःया कथं अज्याःगु पुजा अन थ्वहे वइगु जेठ १९ गते जुइत्यंगु दु ।