बौद्ध सम्मेलनय् खादाया विवाद

येँ – लुम्बिनीइ जूगु अन्तराष्ट्रिय बौद्ध सम्मेलनया पाहांपिंत खादा क्वखायेकेगु खँय् विवाद पिहां वःगु दु । उगु ज्याझ्वलय् पाहांपिंत मन्त्र च्वयातःगु परम्परागत खादायात प्रतिबन्ध यानाः ढाकाया गलबन्दी थेंज्याःगु खादा क्वखायेकूगु खँय् तामाङ सहभागीतय्सं विरोध याःगु खः ।

हिमाली लागाया बौद्धतय्सं प्रयोग याइगु खादायात अन क्वखायेके मबिल धकाः अन वयाच्वंपिं छुं तामाङ पत्रकारतय्सं ग्वसाः खलःयात विरोध प्रकट याःगु खः । तर थ्व खादा उगु प्रदेशया उत्पादन खः धकाः लिसः बिया हल । थ्व विषयय् तामाङ फाउण्डेशन नेपालया केन्द्रीय कमिटीं भत्र्सना याःगु खँ सीदुगु दु ।