‘स्मार्ट सिटी स्वयां तःधंगु भ्रष्टाचार मेगु छु जुइ ?’

येँ (नेपालभाषा टाइम्स) – विकास आयोजनाय् भ्रष्टाचार जुयाच्वंगु धासें उकियात कयाः कारबाही यायेमाःगु माग सत्तारुढ दलया सांसद पम्फा
भुसालं यानादीगु दु ।

प्रतिनिधिसभा राज्य व्यवस्था तथा सुशासन समितिया म्हिगःया बैठकय् भुसालं तःधंगु भ्रष्टाचार स्वयेत नं अख्तियारयात इनाप यानादीगु खः । विकास निर्माणय् भ्रष्टाचार जुयाच्वंगु दसु स्मार्ट सिटी दयेकेगु योजना खः धासें धयादी, ‘पोलिसी पब्लिक प्राइभेट पार्टनरसिपय् यायेगु, अले जनताया जग्गा अधिग्रहण यानाः ४० प्रतिशत यायेगु हँ । थनया रैथाने जनताया जग्गा अधिग्रहण यानाः स्मार्ट सिटी दयेकेगु? थ्व स्वयां तःधंगु भ्रष्टाचार मेगु छु जुइ ?’

वय्कलं स्थानीय जनता, उमिगु जनप्रतिनिधिं माग मयाःगु, संसदीय समितिइ तकं सहलह मजूगु, तर छुं मनूत जानाः आयोजना दयेकेगु व करोडौं
भ्रष्टाचार यायेगु ज्या जुयाच्वंगु धासें अख्तियारं उखेपाखे ध्यान बीमाःगु खँ नं धयादीगु खः ।