
येँ – नेपालभाषा परिषदं दँय्दसं बीगु याना वयाच्वंगु थीथी सिरपाः घोषणा जूगु दु । घोषणा जू कथं परिषद्पाखें थुगु दँय् भाषाथुवाः उपाधिं वरिष्ठ साहित्यकार यज्ञरत्न धाख्वायात सम्मानित याइगु जूगु दु । उकथं हे चित्तधर सिरपाः कवि डा. योगेन्द्र प्रधानयात बीगु जूगु दु ।
अथे हे ठाकुरलाल सिरपाः डा. पुष्पराज राजकर्णिकारयात बीगु जूगु दुसा मोतिलक्ष्मी उपासिका सिरपाः लोचनतारा तुलाधरयात बीगु जूगु दु । अथे हे पूर्णहेरा सिरपाः मोतिलक्ष्मी शाक्ययात व समावेशी कथं बीगु केशव–बाखं सिरपाः अनिता तुलाधरयात बीगु निर्णय जूगु दु ।
याकनं हे छगू ज्याझ्वः यासें थ्व सिरपाः लःल्हाइगु खँ धाःगु दु । शनिवाः जूगु परिषद्या १३ क्वःगु साधारण सभाय् थ्व नां घोषणा जूगु खः । परिषद्या साधारण सभां वर्तमान नायः सुवर्ण शाक्यया हे अध्यक्षताय् ज्यासना पुचः न्हूधाः याःगु दु । न्हूधाः कथं नायः पदय् शाक्य च्वनादीगु दुसा न्वकु नविन चित्रकार, छ्यांज्ये ध्रुव मधिकर्मी, दांभरि मंगला कारंजित व लिउदांभरि पदय् सरस्वती तुलाधर च्वनादीगु दु ।
अथे हे दुजलय् छत्रबहादुर कायस्थ, मदनसेन वज्राचार्य, पुष्परत्न तुलाधर, नरेशवीर शाक्य, भवानी तुलाधर व विमलप्रभा वज्राचार्य च्वनादीगु दु । नारद वज्राचार्यया अध्यक्षताय् नीस्वंगु निर्वाचन कमिटीं सर्वसम्मत रुपं थ्व नां घोषणा याःगु खः ।
LEAVE YOUR COMMENTS