जग्गा व मुआब्जा विवादं ताँ निर्माणय् पंगः

येँ – थीथी थासय् दयेकाच्वंगु ताँ मुआब्जा विवादया कारणं निर्माण अवरुद्ध जूगु दु । स्थानीय पूर्वाधार विभागयाकथं थीथी थासय् दयेका च्वंगु ताँ मुआब्जा विवादं निर्माणय् अवरुद्ध जू वंगु दु । सार्वजनिक जग्गाय् लाःगु थासय् सहज रुपं ताँ निर्माण जूसां नं निजी जग्गाय् तकं ताँ दयेकेगु ज्या जूवनाच्वंगुलिं निर्माणया ज्या अवरुद्ध जूवंगु खः ।

विभागया महानिर्देशक रामचन्द्र श्रेष्ठं यातायाता ताँ मदुगु ग्रामिण थासय् ताँ निर्माण यायेगु ज्या जुइवं जग्गाया भाः नं थहां वनाच्वंगु कनादिल । वय्कःया कथं थःगु जग्गाया भाः थहां वनीगु जुइवं गुलिखे स्थानीयवासिन्दां ताँ दयेकेत जग्गा लाःगु थासय् च्वंपिं स्थानीयं अप्वः मुआब्जा माग यायेगु यानाहःगु दु ।

गुलिखे थासय् ताँ निर्माण जुयाच्वंथाय मुआब्जा विवादया कारणं हे मुुख्य समस्या जुयाच्वंगु वय्कलं धयादिल । १२० मिटर स्वयां चिहाकःगु ताँया निर्माण विभाग यायेगु व व स्वयां नं म्हो हाकः दुगु ताँया निर्माण स्थानीय तह यायेगु याना वयाच्वंगु महानिर्देशक श्रेष्ठं कनािदल ।
विभागं ठेक्का सम्झौता यानाः निर्माण कम्पनीयात निर्माणया जिम्मेवारी बीगु याना वयाच्वंगु दु ।

स्थानीय थाय्या महत्व, ताँ लगायत संरचना निर्माण विभागं हे यानावयाच्वनागु वय्कलं धयादिल । वइगु दिनय् अज्याःगु संरचना निर्माण संघ व प्रदेश सरकारं याइगु जूसां नं आतक पर्याप्त जनशक्ति मदुगुलिं यानाः संघीय सरकारं हे निर्माणया ज्यायात निरन्तरता बिया वयाच्वंगु वय्कलं धयादिल ।