मापदण्ड विरुद्ध प्रमयात ज्ञापन
येँ (नेपालभाषा टाइम्स)÷नेकपा एमालें येँ महानगरपालिकां खुसि सिथय् थप २० मिटर जग्गाय् छेँ दने मदइ कथं तःगु प्रतिबन्ध बदर यायेमाःगु माग यासें म्हिगः प्रधानमन्त्री केपी शर्मा ओलीया ध्यानाकर्षण याकूगु दु । थ्व सम्बन्धी सर्वोच्च अदालतया फैसलाय् न्यायिक पुनरावलोकन यायेत नं एमालें माग याःगु दु ।
नेकपा एमाले येँ जिल्ला कमिटीया दुजःतय्सं म्हिगः प्रधानमन्त्री नापलानाः येँ महानगरपालिकां जारी याःगु सुचं खारेज यायेत व सर्वोच्चया फैसलाय् न्यायिक पुनरावलोकन यायेत माग याःगु खः । एमालेया बागमति प्रदेश इञ्चार्ज डा. राजन भट्टराई, जिल्ला अध्यक्ष दिपक निरौला, येँ मनपाया उपमेयर सुनिता डंगोल, पुलांम्ह मेयर विद्यासुन्दर शाक्य सहितया प्रतिनिधि मण्डलं म्हिगः वालुवाटार वनाः प्रमया ज्ञापन पौ बिउगु खः ।
प्रमयात बिउगु ज्ञापन पतिइ सर्वोच्चया आदेश व येँ मनपाया सुचनां सम्पत्ति भोग याये दइगु संवैधानिक अधिकार हनन जूगु खँ न्ह्यथनातःगु दु । यदि येँ मनपां जारी याःगु सुचं खारेज मजुल धाःसा देशय् असामान्य परिस्थिति ब्वलने फइगु ख्याच्वः नं उकी बियातःगु दु ।
२०६५ मंसिर १ य् मन्त्रिपरिषद्या बैठकं येँया बागमति, विष्णुमति व मनोहरा खुसि सिथय् २० मिटर क्षेत्र दुने संरचना दयेके मदइगु निर्णय याःगु खःसा सर्वोच्च अदालतं वंगु पुस ३ गते थप २० मिटर त्वःतेमाःगु परमादेश जारी याःगु खः । सर्वोच्चया उगु फैसला कथं येँ मनपां नगर प्रमुख स्तरीय निर्णय यासें आः ४० मिटर जःखः छेँ दनेत नक्सा पास मयायेगु सुचं जारी याःगु खः ।
थ्वहे झ्वलय् येँ मनपाया मेयर बालेन साहं सामाजिक सञ्जालय् पोस्ट यासें थम्हं न्हापा याःगु पोष्टयात संशोधन यायेगु कुतः यानादीगु दु । वय्कलं सर्वोच्च अदालतया आदेश वयेधुंकाः येँ महानगरपालिकां उगु आदेशयात सूचित यासें बागमति, विष्णुमतिइ ४० मिटर, तुकुचाय् २० मिटर जःखः निर्माण निषेधित क्षेत्र जानकारी याकागु खँ न्ह्यथंगु दु । वय्कलं थ्व आदेश मनपाया मखुसें सर्वोच्च अदालतया खः धासें जनताय् भ्रम न्यंकेगु ज्या याये मते धकाः नं सतर्क यानादीगु दु । थःगु पोष्टय् वय्कलं धयादीगु दु– अदालतया आदेश कथं जनतायात थःगु जग्गा उपभोग यायेगुपाखें पनातःगु मदु । नेपाल सरकारं चाहे जुल धाःसा मुआब्जा बियाः जक जग्गा अधिग्रहण याये फइ ।
सर्वोच्चया उगु आदेश व उकिया आधारय् येँ मनपां याःगु निर्णय खारेज यायेमाः धकाः सत्तारुढ दल एमाले येँ जिल्ला कमिटीं म्हीग पार्टीगत निर्णय हे याःगु दु ।
मेखे थ्व आदेश विरुद्ध आन्दोलन यायेगु लागिं जनस्तरं नं अभियन्ता सुमन साय्मिया नेतृत्वय् संघर्ष समिति गठन यायेधुंकूगु दु । थुकिया विरुद्ध आः छसिकथं आन्दोलन याना यंकेगु तयारी जुयाच्वंगु दु ।
LEAVE YOUR COMMENTS