आदिवासी जनजाति पत्रकारिता सम्मेलन

येँ – नेवाः राष्ट्रिय पत्रकार दबूपाखें म्हिगः थन छगू ज्याझ्वःया दथुइ मातृभाषा पत्रकारिता सम्मेलन यात । येँ मनपाया मेयर विद्यासुन्दर शाक्यं विशेष पाहां कथं ज्याझ्वःया उलेज्या यासें येँ नगर दयेकेगु खःसा पत्रकारिता ख्यःया नं तःधंगु ग्वाहालि आवश्यक जू, पत्रकारतय्सं केवल यथार्थ खँ जक च्वयेगु याना बिल धाःसां थःत नगर दयेकेगु ज्याय् तिबः जू वनी धयादिल ।

ज्याझ्वःया संयोजक नृपेन्द्रलाल श्रेष्ठं लसकुस यासें न्ह्याकूगु उगु ज्याझ्वलय् ३ नम्बर प्रदेशया सांसद राजेश शाक्य, प्रेस काउन्सिलया दुजः शुभेच्छा बिन्दू, आदिवासी जनजाति पत्रकार महासंघया नायः दण्ड गुरुङ, नेवाः जागरण मञ्चया नायः सुजीव वज्राचार्य, पर्यटन बोर्डया दुजः कृष्ण अर्याल, पत्रकार दबूया नायः श्रीकृष्ण महर्जन व मूछ्यांज्ये सुनिल महर्जनपिंसं आः न्हूगु राजनीतिक व्यवस्थाय् समावेशी सञ्चारया लागिं राज्य न्ह्यचिलेमाःगु खँ कनादिल ।

ज्याझ्वलय् पुष्करभक्त माथेमा, गणेश राई, कृष्णराज सर्वहारी, जगतमान लामा दोंग, तिलक चामलिङ, मणिराज गुरुङ, निम्बीका शेर्पा, सुरेश किरण मानन्धरपिंसं थःथःगु भाषाया पत्रकारिता बारे ज्यापौ न्ह्यब्वयादीगु खः । ज्याझ्वःया अन्तिमय् जनजाति पत्रकारिता सम्बन्धी घोषणापत्र नं जारी याःगु खः ।