झापाय् शंखधरया झ्वाता तयेत जग्गा

येँ(नेपालभाषा टाइम्स)÷नेवाः देय् दबू अर्जुनधारा नगर समिति झापां नेपाल संवत्या प्रवर्तक राष्ट्रिय विभूति शंखधर साख्वाया झ्वाता पलिस्था याइगु जूगु दु । थुकिया निंतिं देय् दबू अर्जुनधारा जग्गा नं प्राप्त यायेधुंकूगु दु । जग्गा प्राप्तिलिसें शंखधरया झ्वाता पलिस्थया निंतिं शिलान्यास लिसें लाखे प्याखंया नं उलेज्या याःगु दु ।

राष्ट्रिय विभूति शंखधर साख्वाःया झ्वाता तयेत सालबारी नमूना वन क्षेत्रय् करिब १२ कठ्ठा जग्गा कायेत ताःलाःगु खँ देय् दबू अर्जुनधारा नगर समिति झापां जानकारी बिउगु दु ।

शंखधरया झ्वाता तयेत जग्गा कायेत ताःलाःगु थाय् उगु लागाया पर्यटन क्षेत्र नं खः । पर्यटन क्षेत्र जूगुलिं उगु लागाया दकलय् तजाःगु थासय् शंखधरया झ्वाता पलिस्था यायेगु नगर समितिया नायः रुद्रमणी श्रेष्ठं घोषणा यानादीगु दु ।

थुगु ज्याया निंतिं अर्जुनधारा नगरपालिकाया प्रमुख बलदेव सिंह गोम्देन तामाङ, १ नं प्रदेशया सांसद बिर्ख प्रधानं माःगु ग्वाहालि यायेगु बचं बियादीगु नायः श्रेष्ठं कनादिल ।

मूपाहांकथं झायादीम्ह देय् दबूया सचिव दिनेश शाक्यं शंखधरया झ्वाताया शिलान्यास यानादिसें देय् दबू केन्द्रपाखें नं माःगु ग्वाहालि यायेगु प्रतिवद्धता प्वंकादिल । शंखधरया झ्वाता पलिस्थालिसें आः उगु क्षेत्रय् भिंद्यःया देगः, बौद्ध चैत्य, देगः व भवन नं दयेकेगु योजना दुगु जानकारी बिउगु खः ।

ज्याझ्वलय् झापा जिल्लाया थीथी खलःया पुचः व जातीय संगठनया प्रतिनिधितय् सहभागिता दुगु खः ।

सम्बन्धित बुखँ

LEAVE YOUR COMMENTS