भारतपाखें लगातार नेपाःया कुटनीतिक भ्रमण, आः भारतीय विदेश सचिवया पाः
येँ (नेपालभाषा टाइम्स) – नेपाः व भारत दथुइ स्यनाच्वंगु स्वापू सुधार यायेगु निंतिं भारतीय विदेश सचिव हर्षवद्रर्धन शृब्गला नेपाः वइगु चर्चा शुरु जूगु दु। अथे खःसां नेपाःया परराष्ट्र मन्त्रालयं धाःसा उकिया औपचारिक जानकारी थःपिंके मदुगु खँ धाःगु दु ।
भारतीय विदेश सचिवया नेपाः भ्रमण भारतीय सञ्चार माध्यमतय्सं धाःसा वंगु सोमवाः हे समाचार च्वयेगु शुरु यायेधुंकूगु दु । विदेश सचिव हर्षवद्रर्धन औपचारिक वार्ताया निंतिं येँय् वनेत्यंगु समाचार भारतीय सञ्चार माध्यमतय्सं च्वया हःगु खः । निगू देय् दथुइ ब्वलनाच्वंगु तनाव कम यानाः सम्बन्ध सुधार यायेगु कुतः कथं भारतीय विदेश सचिव नेपाः वयेत्यंगु खँ भारतीय सञ्चार माध्यमं न्ह्यथनातःगु दु ।
तर परराष्ट्र मन्त्री प्रदीप ज्ञवालीं धाःसा विदेश सचिवया नेपाः भ्रमण बारे नेपाःयात छुं जानकारी मदुगु खँ धाःगु दुसा परराष्ट्र मन्त्रालयं नं भारतीय सञ्चार माध्यमं समाचार प्रकाशन यायेधुंकाः जक उकिया जानकारी थःपिंत वःगु खँ धाःगु दु। परराष्ट्र मन्त्रालयया कथं निगू देय् दथुइ जुइगु बैठक निगुलिं देशं क्वःछीगु प्रचलन दुगु खःसा थौंकन्हय् अज्याःगु छुं नं कथंया औपचारिक ज्याझ्वः मदुगु खँ परराष्ट्रं धाःगु दु । तर भारतीय सञ्चार माध्यमं धाःसा भारतीय विदेश सचिवया भ्रमणया झ्वलय् परराष्ट्र मन्त्री ज्ञवालीयात नापलाइगु खँ नं न्ह्यथनातःगु दु ।
थ्व स्वयां न्ह्यः भारतीय गुप्तचर संस्था रिसर्च एण्ड एनालाइसिस विङ (रअ) प्रमुख सामन्तकुमार गोयलं नेपाः भ्रमण याःगु खःसा वयां लिपा भारतीय सेनाया प्रमखु जनरल एमएम नरवणें नेपाः भ्रमण याःगु खः । सेना प्रमुख नरवणेया भ्रमण जूगु छुं न्हि लिपा हे भारतीय विदेश सचिवं नेपाः भ्रमण याइगु खँ पिदंगु खः ।
भारतीय विदेश सचिव थ्वहे वइगु मंसिर ११ गते नेपाः थ्यंकः वइगु समाचार भारतीय सञ्चार माध्यमं सार्वजनिक याःगु खःसां नेपाःयात धाःसा उकिया बारे जानकारी मदुगु खँ धयाच्वंगु दु। भारतीय सञ्चार माध्यमय् धयातःकथं भारतीय विदेश सचिवं नेपाः वयाः राष्ट्रपति विद्यादेवी भण्डारी व प्रधानमन्त्री केपी शर्मा ओलीयात नापलाइगु ग्वसाः दु ।
भारतीय सेना प्रमुखं प्रधानमन्त्री केपी शर्मा ओलीयात नापलायेगु झ्वलय् नेपाः-भारत दथुया सम्बन्ध कायम यायेत व फुक्कं कथंया समस्या वार्ता व सहलह यानाः समाधान यायेगु बारे खँल्हाबल्हा जूगु खँ भारतीय सञ्चार माध्यमं सार्वजनिक याःगु खः । औपचारिक वार्ताया झ्वलय् विदेश सचिव शृङ्गलां सिमाना विवादयात केन्द्रित यानाः सहलह याइगु खँ नं भारतीय सञ्चार माध्यमं न्ह्यथंगु दु। शृब्गलाया पाजुपिं यलय् च्वंपिं जूगुलिं नं वय्कलं नेपाः व भारत दथुया सम्बन्ध सुधार यायेत सकारात्मक भूमिका म्हिते फइगु अनुमान नं भारतीय सञ्चार माध्यमं यानातःगु दु ।
LEAVE YOUR COMMENTS