आः धर्मभक्त अंग प्रत्यारोपण केन्द्र

ख्वप : थनया मानव अंग प्रत्यारोपण केन्द्रं आः तक ३८६ म्हेसिया जलस्येँ (किड्नी) प्रत्यारोपण यायेधुंकूगु दु । २०६९ वैशाख ११ गते सेवा सञ्चालन जूगु न्हिनिसें थौं तकया दुने केन्द्रं ३८६ म्हेसिया जलस्येँ प्रत्यारोपण याःगु खः । थुगु दँया वैशाखंनिसें आः तक १०४ म्हेसिया जलस्येँ प्रत्यारोपण यानागु खँ केन्द्रया कार्यकारी निर्देशक डा. पुकारचन्द्र श्रेष्ठं कनादिल ।
केन्द्रं चछिन्हिछिं हे न्हिं सछिम्ह तक विरामीया हेमोडायलाइसिस यानाच्वंगु दु । थ्व केन्द्र मस्तिष्क मृत्यु जूम्ह मनूया जलस्येँ लिकयाः मेम्हेसित प्रत्यारोपण, स्येँ समेत सफलतापूर्वक यायेधुंकूगु दुसा आः याकनं हे ख्वपय् नुगःचुया न्हापांखुसी ओपन हर्ट सर्जरी नं जुइगु खँ डा. श्रेष्ठं कनादिल ।
थ्व केन्द्रया नां आः ‘धर्मभक्त मानव अंग प्रत्यारोपण केन्द्र’ तइगु जूगु दु ।