कुलेश्वर मानन्धरपाखें बैकुण्ठ मानन्धरयात हना

येँ – राष्ट्रिय धावक बैकुण्ठ मानन्धरयात येँ मनपा १४ वडास्थित कुलेश्वर मानन्धर परिवारं सम्मान याःगु दु । शनिवाः जूगु कुलेश्वर मानन्धर परिवारया दँमुँज्याय् वय्कःयात हनापौ लःल्हासें सम्मान याःगु खः । ज्याझ्वलय् वय्कःयात मानन्धर परिवारया नायः बौद्ध विद्वान गुह्यश्वरीराज मानन्धरं हनापौ लःल्हानादीगु खः ।

ज्याझ्वलय् स्वास्थ्य सुझाव बिसें नुगःचु सम्बन्धी ल्वय्या विशेषज्ञ डा. हरिहर खनालं नुगःचु बल्लाकेगु खःसा नयेगु आनीबानी, नियमित व्यायाम व सकारात्मक सोचपाखे ध्यान बीमाःगु खँ कनादिल । सम्मानित व्यक्तित्व बैकुण्ठ मानन्धरं १७ दँ न्ह्यः थःगु नुगःचुया बाइपास सर्जरी जूगु खःसां नियमित व्यायामं यानाः थः अझ नं सक्रिय जुइ फुगु खँ कनादिल ।

लसकुस न्वचु बिसें परिवारया न्वकू हरिओम मानन्धरं केन्द्रीय मानन्धर संघपाखें संस्कार संस्कृति सुधारया लागिं थीथी निर्णयत यानातःगुलिं उकियात सकस्यां पालना यायेमाःगु बिचाः तयादिल ।

ज्याझ्वलय् परिवारया छ्यांज्ये रमेश मानन्धर व दांभरि गौतम मानन्धर लिसें मिसा विकास उपसमितिया संयोजक अनुसुया मानन्धर व स्वास्थ्य उपसमितिया संयोजक हरिओम मानन्धरपिंसं थःथःपिनि प्रतिवेदन न्ह्यब्वयादीगु खः । ज्याझ्वलय् न्वकू पञ्चकुमारी मानन्धर व दुजः डा. धर्मशरण मानन्धरं नं नुगःखँ प्वंकादीगु खः ।

ज्याझ्वलय् मचांनिसें नेवाः भाय् ल्हायेगु याना च्वनादीम्ह मचा संगीत मानन्धरयात द्वःछि तकाया सिरपाः बीगु लिसें परिवारयात ग्वाहालि यानादीपिं थीथी व्यक्ति व सहभागीपिंत निःशुल्क स्वास्थ्य सेवा बियादीम्ह कुलेश्वर पोलिक्लिनिकया प्रमुख राजेन्द्र श्रेष्ठयात नं हनापौ लःल्हायेगु ज्या जूगु खः ।