नेवाः पुचः शंखधर टोल समितिया निक्वःगु तःमुँज्या

येँ – नेवाः पुचः शंखधर टोल समिति इटहरी सुनसरीया निक्वःगु तःमुँज्या जुल । तःमुँज्याया उलेज्या नेवाः पुचःया नायः विनोद चोन्छेँ श्रेष्ठं त्वाःदेवाय् मत च्याकाः यानादीगु खः । इटहरीइ च्वंगु नेपाः बहुउद्देश्यीय सहकारी भवनय् जूगु तःमुँज्याय् नासें मूपाहां श्रेष्ठं आः थःपिंसं मचा जंक्वनिसें कयाः ज्याजंक्व तक दक्वं नेवाः संस्कार व नेवाः रीतिथिति, पर्व नेवाः पुरोहित हे तयाः चले यायेत नेवाः पुरोहित (गुभाजु) तया याये धुंगु खँ कनादिल ।

ज्याझ्वलय् नेपाः बहुउद्देश्यीय सहकारी संस्थाया नायः नारायणप्रसाद श्रेष्ठं संस्थापाखें नेवाः भाय्, कला, साहित्य व संस्कृतिया उत्थान व विकासया निंतिं मदिक्क ज्या याना वन धाःसा सफल जुइ धासें सुलाः सुलाः ज्या यायेगु प्रवृत्ति अन्त्य यानाः संगठित शक्ति निर्माण यानाः न्ह्याः वनेमाः धयादिल ।

नेपाःया राष्ट्रिय म्येँ व नेपालमण्डया राष्ट्रिय म्येँ हायेकाः न्ह्याकूगु ज्याझ्वलय् संस्थाया सल्लाहकार लक्ष्मीप्रकाश श्रेष्ठ, नेपालभाषा प्रशिक्षक कृष्ण प्रजापति, धुलिखेल सेवा समाजया अध्यक्ष प्रविण श्रेष्ठ लगायतं नुगःखँ तयादीगु खः ।

नेवाः मिसा पुचःया पुष्पा श्रेष्ठ व ज्याझ्वःया संयोजक अम्बिका श्रेष्ठं भिंतुना देछानादीगु ज्याझ्वलय् नेवाः पुचः इटहरीया न्हूगु ज्यासना पुचलय् निर्वाचत जुयादीपिंत नं हनेज्या याःगु खःसा मिसा पुचः व ल्याय्म्ह पुचःया दुजःपिं हनापौ देछानाः सम्मान याःगु खः ।

नेवाः पुचः शंखधर टोल समितिया अध्यक्ष विदुरप्रसाद माकःया सभापतित्वय् जूगु तःमुँज्याय् छ्यांजे राजन श्रेष्ठं वार्षिक प्रतिवेदन व दांभरिं युवराज श्रेष्ठं आर्थिक प्रतिवेदन न्ह्यब्वयादीगु खः । निगुलिं प्रतिवेदन सहलह लिपा पारित नं याःगु खः ।