ने. सं. ११४६ बछलागा पञ्चमी -

येँ मनपापाखें सिंहदरवारया ध्वाखा सुचुकुचु

येँ – येँ महानगरपालिकां देय्या प्रमुख प्रशासनिक केन्द्र सिंहदरवारया मूलुखाया सुचुकुचु याःगु दु । येँ मनपां सिंहदरवार दुहां वनेगु मूलुखाय् वथं गयाच्वंगु, सिमा हः लिकायेगु ज्या जूगु खः ।

येँ मनपा वातावरण व्यवस्थान विभागपाखें देय्या प्रमुख प्रशासनिक केन्द्र सिंहदरवारया च्वय्पाखे बुया वयाच्वंगु झाः, क्वय्पाखे वथं गयाच्वंगु दक्वं चिइकाः सुचुकुचु याःगु खः । सिंहदरवारया मूलुखाय् सुचुकुचु यायेगु झ्वलय् डबल एक्स्टेन्सन ल्याडरया प्रयोग याःगु खःसा उकियापाखें मूलुखाया च्वथ्यंकं सुचुकुचु यायेगु सम्भव मजूगु व सुरक्षित नं मजुइवं दमकलया ग्वाहालि काःगु खः । दमकलया स्वाहाने
छ्यलाः लुखाय् च्वथ्यंकं सुचुकुचु याःगु खः ।

विभागया करिब पीम्हं मल्याक कर्मचारीं लुखाय् च्वय्पाखे बुया वयाच्वंगु झाः लीगु, दुहां वनेगु लुखाय् लानातःगु अप्पाय् वथं गयाच्वंगु प्वलेगु नापं धः व मंगाःया नं सुचुकुचु याःगु खः ।