तःधंपिंसं मनपायात कर मपू

सकस्यां कर पुला बिउसा नगरया यक्व विकास जुइ फइगु

येँ – स्थानीय निकायं चीधंपिं करदातातय्त बाध्य हे यानाः कर पुइकेगु यानाच्वंसां तःधंपिं करदातातय्त धाःसा कर पुइके मफयाच्वंगु खँ सीदुगु दु । यल महानगरपालिका दुने लाःगु आपालं धइथें तःधंगु हस्पिटल, बोर्डिङ स्कुल, डिपार्टमेन्ट स्कुल, पार्टी प्यालेस व पेट्रोल पम्पतय्सं स्थानीय निकाययात कर पुलेगु धाल कि आनाकानी यानाच्वंगु खँ यल मनपाया राजश्व प्रशासन प्रमुख दिलराज शाक्यं नेपालभाषा टाइम्स यात कनादीगु दु ।

वय्कलं कनादी कथं यलया भाटभटेनी सुपर मार्केट, बिग मार्ट, पाटन संयुक्त क्याम्पसया भवनय् चायेकातःगु लाबिम मल, महेन्द्र आदर्श स्कुलय् चायेकातःगु सेल्स बेरी आदितय्सं ताकेता याःसां नं मनपायात कर पूमवः । अथेहे जनताया सेवा यायेत चायेकातःगु सुमेरु हस्पिटल, मेडिसिटी हस्पिटल, नेसनल क्यान्सर हस्पिटल आदितय्सं नं मनपायात कर पुलेत वेवास्ता यानाच्वंगु द्वपं वय्कलं बियादीगु दु ।

अथेहे जेम्स स्कुल, लिटिल एन्जल्स स्कुल, एभीएम स्कुल, डीएभी स्कुल लिसें यल मनपाय् दुगु आपालं सहकारी संस्थां तकं कर पुलेत वास्ता यानाच्वंगु मदु । थथे तःधंगु संस्थां कर मपूगुलिं विकास निर्माणया ज्या नं प्रभावित जुयाच्वंगु खँ कनादिसें वय्कलं यदि उमिसं कर पूगु जूसा नगरय् आपालं विकास निर्माणया ज्या यायेफइगु बिचाः नं तयादिल ।

मेडिसिटी हस्पिटलं कर मपुसे हे हस्पिटलया स्तरोन्नती यायेमाल धकाः सिफारिस काः वयाच्वंगु जानकारी बिसें वय्कलं न्हापां कर निं पु अले जक सिफारिस बी धकाः मनपां अडान कयाच्वंगु खँ कनादिल । वय्कलं धयादी, ‘सछिगू बेड थप यायेमाल धकाः वडाय् सिफारिस काः वयाच्वंगु दु तर वडाय् कर पुलेत धाःसा लिचिलाच्वंगु दु ।’

सरकारी निकायं हे ग्वाहालि मयाःगुलिं उमिके कर म्हयेत समस्या जुयाच्वंगु खँ कँसें वय्कलं धयादिल, ‘आः मेडिसिटी हस्पिटलयात कर मपूसां नं सिफारिस बीमाल धकाः च्वं दबाब वयाच्वंगु दु ।’ मनपाया कर मपुलीपिंत नेपाल विद्युत प्राधिकरण, खानेपानी संस्थान, टेलिफोन कम्पनी, इन्टरनेटया सेवा प्रदायक संस्था व सडक विभागं नं थःपिनि सेवा मबीगु खःसा स्वतः तःधंपिं व्यवसायीतय्सं नं कर पुलीगु खँ यल मनपा सूत्रं धाःगु दु ।

थज्याःगु ज्याय् सरकारी निकायतय्सं ग्वाहालि यात धाःसा कर म्हयेत अःपुइगु मनपाया आशा दु ।यलय् आः तक कर मपूपिं ८० गू संस्थाया धलः थःपिंके दुगु खँ कनादिसें भाजु शाक्यं व स्वयां नं अप्वः कर मपूपिं दइगु सम्भावना प्वंकादिल । यल मनपां करदातातय्त आकर्षित यायेत कर छुटया घोषणा यानागु खःसां नं कर पुलेत धाःसा तःधंपिं करदाता मवःगु खँ नं वय्कलं कनादिल ।

सम्बन्धित बुखँ

LEAVE YOUR COMMENTS