ने. सं. ११४३ तछलाथ्व त्रयोदशी -

त्रिशुली ३ बी सवस्टेशन निर्माणय् न्ह्यथनेबहःगु प्रगति

येँ – नेपालय् छुं नं आयोजना क्वःछिनातःगु इलय् सीमइगु ल्वय् देय्न्यंकं न्यनाच्वंगु दु । तःधंगु, चीधंगु फुक्क धयाथें आयोजनाय् थज्याःगु हे नियति जुयाच्वंगु दु । निर्माण व्यवसायीतय्सं थीथी बहाना तयाः जुल ला, स्थानीयतय् पंगलं जुल ला वा मेगु छुं प्राविधिक व प्रशासनिक झन्झटं जुल, परियोजना लिबाइगु हे जुयाच्वंगु दु ।

परियोजना इलय् हे क्वमचाइगुलिं यानाः यक्व ई जक काइगु मखु, लागत नं अप्वः जुयाः दीर्घकालिन रुपं हे नकारात्मक लिच्वः लाइगु जुयाच्वंगु दु । तर त्रिशुली खुसीया बेसिनय् दयेकाच्वंगु ६०० मेगावाट क्षमताया आयोजनापाखें उत्पादन जुइगु मतयात राष्ट्रिय प्रणालीइ स्वायेत दयेकाच्वंगु छगू आयोजनाया निर्माण प्रगति धाःसा ल्वःवनापुसे जुयाच्वंगु दु ।

त्रिशुली ३ बी सव स्टेशन दयेकेगु ज्या न्ह्याःगु यक्व मदुनि । वंगुचैत निसें सुरु जूगु थ्व आयोजनाया ६० प्रतिशत ज्या क्वचायेधुंकूगु दु । इलय् हे ज्या मजुइगु संस्कार पाखें पिहां वयाः थ्व आयोजनाय् युद्धस्तरं ज्या जुयाच्वंगु दु ।लिपांगु विवरण कथं माथिल्लो त्रिशुली थ्री बी हब सवस्टेशनया ट्रान्सफर्मर तइगु थासय् जग तयेधुंकूगु दुसा कन्ट्रोल विल्डिङ दयेकेगु सुरु जूगु दु ।

त्रिशुली खुसि सिथय् सबस्टेशनया सुरक्षाया निंतिं पःखाः ग्वयेगु ज्या अन्तिम चरणय् थ्यनेधुंकूगु खँ आयोजनां धाःगु दु । सवस्टेशनय् छ्यलीगु उपकरणया उत्पादन ज्या जुयाच्वंगु व थुपिं उपकरण नं वइगु लत्याया दुने आयोजनास्थलय् थ्यनीगु जूगु दु ।

नेपाल विद्युत प्राधिकरणया कार्यकारी निर्देशक कुलमान घिसिङं नुवाकोटया किस्पाङ गाउँपालिका ५ पहिरेबेंसीय दयेकाच्वंगु सबस्टेशनया स्थलगत निरीक्षण यानाः आयोजना व्यवस्थापन, परामर्शदाता व ठेकेदार कम्पनीयात क्वःछिनातःगु इलय् दयेके क्वचायेकेत निर्देशन बियादीगु खँ आयोजना प्रमुख थर्कबहादुर थापां कनादिल ।

भौतिक प्रगति तसकं बांलाः, जिमिसं इलय् हे ज्या क्वचायेकेगु कथं ज्या न्ह्याकाच्वनागु दु’ आयोजना प्रमुख थापां धयादिल । ‘थ्व सवस्टेशन दछिया दुने दयेके सिमधल धाःसा चिलिमे ज लविद्युत कम्पनीया अगुवाइलय् दयेकाच्वंगु १६८ मेगावाट विद्युत राष्ट्रिय प्रणालीइ स्वाये मफयाः मत सितिकं वनेफुगु अवस्था वयेफु ।

थज्याःगु अवस्था वल धाःसा प्राधिकरणं थज्याःगु आयोजनायात करोडौं तका जरिवाना पुलेमाली’ कार्यकारी निर्देशक घिसिङं धयादीगु दु । ‘निर्माणया इलय् वयेफुगु सामाजिक, वित्तीय लगायतयात समस्या ज्यंकाबी, थज्याःगु संवेदनशील आयोजनाया ज्या निर्धातिर इलय् क्वचायेके धयां जक मजिउ, फुक्कं पक्ष गम्भीर जुयाः ज्या यायेमाः’ घिसिङं धयादीगु दु ।

थ्व सवस्टेशन दयेके ज्या वइगु पुसया निगूगु वाः दुने क्वचायेकेगु लक्ष्य तयातःगु दु । वंगु जेठय् छुं स्थानीयवासीतय्सं नियतपूर्वक थीथी माग तयाः पंगः थंवःगु खः । नाजायज माग तयाः पंगः थनेवं तंम्वःम्ह घिसिङं नाजायज माग तयाः पंगः थन धाःसा प्रहरीमार्फत ज्वंकेगु ख्याच्वः तकं बियादीगु खः ।

स्थानीयया जायज माग पूवंकेत आयोजना न्ह्याबलें तयार दुगु धासें वय्कलं नियतबस ज्या दिकेगु स्वल धाःसा सुयातं मत्वःतेगु खँ धयादीगु खः । थ्व आयोजना नेपाः सरकार व प्राधिकरणया लगानी व जर्मन विकास बंैक, युरोपेली लगानी बैंकया सहुलियतपूर्ण त्यासा पाखें दयेकाच्वंगु खः । थ्व आयोजनाया अनुमानित लागत छगू करोड ६० लाख अमेरिकी डलर दु ।