थारू भासं निवेदन दुहां मवः

येँ – वंगु माघ १ गते दाङया घोराही उपमहानगरपालिकां थारू भाय्यात ज्याखँया भाषाया मान्यता बीगु धकाः निर्णय याःसां आः तक नगरपालिकाय् थारू भासं च्वयातःगु छगू हे निवेदन दुहां मवःगु खँ धाःगु दु । घोराही उपमनपा लगायत अनया १९ गुलिं वडाय् थारू भासं दुहां वःगु निवेदनयात नं मान्यता बीगु धकाः घोषणा याःसां निवेदन हे दुहां मवःगुलिं थारू अभियन्तातय्सं चिउताः प्वंकूगु दु ।

उपमनपाया मेयर नरुलाल चौधरीं यदि थारू भासं निवेदन दुहां वल धाःसा उकियात गय् यानाः प्रक्रियाय् न्ह्याकेगु धकाः सहलह यानाच्वनागु खःसां निवेदन हे दुहां मवःगुलिं अज्याःगु सहलह नं ज्या मवःगु खँ कनादिल । उपमनपां तयारी व नीति हे मदयेक थारू भाय्यात नं मान्यता बीगु धकाः निर्णय याःगु कारणं थथे जूगु खँ धाःगु दु ।

थारू भासं नं निवेदन दुकायेगु धकाः निर्णय याःसां अज्याःगु निवेदन बारे गय् यानाः कारवाही यायेगु धइगु छुं तयारी उपमनपायाके मदुनि । दाङ जिल्ला थारू बहुल लागा खः । थनया कुल जनसंख्याया २९ प्रतिशत जनता थारू खः । भाय् ल्हाइपिं धाःसा २८ प्रतिशत थारू दु । भाय् ल्हाइपिं धाःसा न्हापांगु ल्याखय् खस नेपाली ल्हाइपिं हे दु । थारू समुदाय यक्व दुगुलिं थारू भाय्यात नं अन मान्यता बिउगु खः ।