खुल्लामञ्चय् जा नकेत धेंधेंबल्लाः !

येँ (नेपालभाषा टाइम्स) – थनया खुलामञ्च लागाय् गरिब-असहायपिंत जा नकः वइपिं पुचःतय् दथुइ नं थवंथवय् धेंधेंबल्लाः जुयाच्वंगु खँ सीदुगु दु । खुलामञ्चय् फोहोर व धूया दथुइ तयाः जा नकेगु बन्द या धकाः येँ मनपां याःगु इनापया कारणं विवाद पिहां वःगु खःसा मनपां पार्टी प्यालेसय् तयाः जा नकल धाःसा उकिया खर्च थःपिंसं व्यहोरो याना बीगु बचं बिउगु खः । मनपाया थ्व प्रस्तावयात छुं पुचलं स्वीकार याःगु दुसा राजनीतिपाखें प्रभावित मेगु छुं पुचःतय्सं धाःसा अझं स्वीकार याःगु मदुनि ।

सूत्रतय्सं धाः कथं खुला मञ्चय् गरिब असहाय धाःपिंत जा नकेगु लागिं थौंकन्हय् न्हय्गू च्यागू पुचः सक्रिय जुयाच्वंगु दु । उमि थवंथवय् समन्वय सिबें नं प्रतिस्पर्धा अप्वः जुइगु याः । सुनां जा नकीबलय् दकलय् अप्वः मनू वः धइगु खँय् उमि दथुइ धेंधेंबल्लाः जुइगु खः । जा नकेगु खँय् धेंधेंबल्लाः जुयाः थौंकन्हय् अन जा जक मखु, सुथय् चिया, नास्ता, जा, न्हिनय् खाजा समेत यानाः न्हिं न्याक्वः तक नकेगु जुयाच्वंगु दु। छुं ई न्ह्यः तक ला न्हिं न्हय्कः तक नं नकेगु ज्या जूगु खः ।

अन नकः वइपिं फुक्क धइथें पुचःतय्त थ्व ज्याया लागिं विदेशं ध्यबा छ्वया हइगु खँ सीदुगु दु । उकी मध्ये गुलिं पुचःयात खुला तकया लागिं ध्यबा वयाच्वंगु दुसा गुलिं पुचःयात स्वलाया लागिं ध्यबा वयाच्वंगु दु । थ्व ध्यबा कायेगु लागिं उमिसं थःपिंसं जा नकाच्वनागु व जा नः वयाच्वंगु किपा सामाजिक सञ्जालय् तयाः प्रचार मयासें मगाः ।

येँ मनपां पार्टी प्यालेसय् तयाः जा नकेगु यात धाःसा थःपिंसं नं ग्वाहालि याये धकाः न्ह्यःने हःगु प्रस्तावयात छुं पुचःतय्सं स्वीकार याःगु दुसा राजनीतिक प्रभावय् दुगु पुचःतय्सं धाःसा अझं बिचाः याये मानि धयाच्वंगु खँ सीदुगु दु ।