बञ्चरेडाँडा साइतय् हानं आन्दोलन, असोजंनिसें फोहोर बन्द
येँ (नेपालभाषा टाइम्स)÷थःपिनिगु माग पूमवंगु धासें बञ्चरेडाँडा ल्याण्डफिल साइट प्रभावित क्षेत्र सरोकार समितिं आः हाकनं येँया फोहोर वाके मबीगु जूगु दु । थःपिनिगु माग पूमवंगु धासें वइगु असोज १ गतेनिसें फोहोर वायेगुली प्रतिबन्ध तयेगु घोषणा उमिसं याःगु दु ।
म्हिगः येँय् पत्रकार सम्मेलन यासें सरोकार समितिं फोहोरया कारणं स्थानीय बासिन्दायात नकारात्मक लिच्वः लाःसां नं सरोकारवाला निकायं उकियात मखंछु याःगुलिं फोहोर वायेगु बन्द याकेगु निर्णय यानागु खँ धाःगु दु ।
पत्रकार सम्मेलनय् प्रभावित क्षेत्रयात विशेष संवेदनशील क्षेत्र घोषणा यानाः उकथं कार्यान्वयन यायेमाःगु माग याःगु खः । समितिं प्रदुषण रहित मानव बस्ती व मानव रहित ल्याण्डफिल साइत आःया निकासा खः धाःगु दु । सरकारं प्रभावित क्षेत्रया सम्बन्धय् थीथी इलय् याःगु निर्णय कार्यान्वयन मयासे थःपिंत जन्मभूमिं विस्थापित यायेत स्वःगु द्वपं नं बिउगु दु ।
सरकारं ल्याण्डफिल साइत प्रभावित क्षेत्रयात विशेष संवेदनशील क्षेत्र घोषणा मयाःगु, प्रभावित क्षेत्रयात अधिग्रहण यायेमाःगु, मानव बस्ती रहित हरियाली क्षेत्र कायम यायेमाःगु, अस्पतालजन्य फोहोर, विषाधिजन्य फाहोर, औद्योगिकजन्य फोहोरय् प्रतिबन्ध मतःगु द्वपं बिउगु दु ।
पत्रकार सम्मेलनय् १ असोज लिपा सरकारं जबरजस्ती यात धाःसा झिद्वः मनूत येँया तिंख्यलय् वयाः वयाः आन्दोलन यायेगु जुइ धकाः नं ख्याच्वः बिउगु दु ।
LEAVE YOUR COMMENTS