किपू नगरपालिकां नगर गौरव आयोजनायात प्राथमिकता बीगु

येँ – किपू नगरपालिकाया उपमेयर सरस्वती खड्कां नगरपालिकां आर्थिक दँ २०७६÷७७या बजेटय् किपू नगरया गौरव कथं न्ह्याकेगु थीथी आयोजनायात प्राथमिकता बियाः बजेट दयेकीगु खँ धयादीगु दु । वय्कलं किपू नगर गौरव कथं पुष्पलाल पार्क निसें चम्पादेवी तक केबलकार संचालन यायेगु व युद्ध स्मारक पार्क दयेकेगु ज्या जुइगु खँ धयादीगु दु ।

चम्पादेवी केवलकार संचालनया निंतिं अध्ययन यायेगु ज्या न्ह्यायेत्यंगु व अध्ययनया निंतिं इच्छुक कम्पनीतय्सं सितिकं अध्ययन यायेगु निंतिं वयाच्वंगु खँ नं वय्कलं धयादीगु दु । अथेहे युद्धस्मारक पार्कय् ल्वहंया मूर्ति सम्बन्धी कार्यशाला जुइधुंकूगु व थ्व पार्क दयेकेगु निंतिं वइगु दँय् प्राथमिकता बीगु खँ नं वय्कलं धयादीगु दु ।

किपु नगरपालिकापाखें याना वयाच्वंगु लय्लय्पतिकं पत्रकार नापलायेगु ज्याझ्वलय् न्ववानादिसें वय्कलं किपुली परिक्षणया रुपय् नयाँबजारपाखे दयेकागु प्लाष्टिकया सतकय् छुं भचा प्राविधिक त्रुटी खनेदुगु खँ नं धयादीगु दु । थुगु सतक दयेकाबलय् न्हापा हे पीच यानातःथाय् न्हूगु पीच स्वाः वनीगु ‘ज्वाइन्ट’य् पिच ब्वला वइगु समस्या जूगु खँ धासें प्राविधिक कारणं थज्याःगु समस्या वःगु खँ वय्कलं धयादीगु दु ।

वय्कःया कथं पीच यायेधुंकाः ४८ घन्टा सतकय् गाडी चले याकेमजिउगुलि २४ घन्टा लिपा हे गाडी चले जूगुलिं नं समस्या वःगु खः। उपमेयर खड्कां आः पीच ब्वला वःथाय् हाकनं प्लाष्टिक छ्यलाः दयेकातःगु अलकत्रा पाखें हे याकनं पीच यायेगु खँ नं धयादीगु दु । ज्याझ्वलय् नगरपालिकाया थीथी शाखा पाखें जूगु ज्याया प्रगति विवरण नं न्ह्यब्वयेगु ज्या जूगु खः ।

थ्व झ्वलय् वैशाख मसान्त तकया दुने चालु खर्च ५२.३८ प्रतिशत व पुँजीगत खर्च २७.०९ प्रतिशत यानाः समग्रय् ३७.१८ प्रतिशत खर्च जूगु जानकारी नं बिउगु दु । थ्व धयागु आर्थिक दँ २०७५÷७६ या बजेट ८३ करोड ३० लाख मध्ये ३० करोड ८७ लाख ६८ करोड ४८० तका खर्च जूगु दु ।