भारतय् प्याज निर्यात बन्द, नेपालय् अझ भाः थहां वनेफु

येँ – भारतया केन्द्र सरकारं प्याज निर्यातय् प्रतिबन्ध तयाबिउगु दु । भारतया संयुक्त वाणिज्य तथा उद्योग मन्त्रालयं आइतवाःनिसें लागू जुइ कथं प्याज निर्यातय् प्रतिबन्ध तःगु खः। भारतया थुगु निर्णयया लिच्वः नेपालय् नं लाइगु सम्भावना अप्वःगु दु ।

थौं कन्हय् खुद्रा व्यापारीतय्सं प्याज प्रति किलो १२० तकां मियाच्वंगु दुसा आः उकिया भाः अझ थहां वनेफुगु खँ कालिमाटी तरकारी बजारया व्यापारीतय्सं धाःगु दु । म्हिगः कालिमाटी तरकारी बजारय् प्याजया थोक भाः प्रतिकिलो ९५ तका जुयाच्वंगु खःसा आः थ्व भाः थहां वनेफुगु खँ धाःगु दु ।

निर्यात अप्वयाः भारतया स्थानीय बजारय् प्याजया भाः थहां वनाः भारु ८० तका थ्यनेवं निर्यात पनागु खँ भारत सरकारया प्रवक्ता शितांशु केरं सञ्चार माध्यमयात कनादीगु दु । भारतया दिल्ली व मुम्बई थेंज्याःगु शहरय् प्याज प्रति किलो ७० निसें ८० तका भारु थ्यंगु दु । अन प्याजया होलसेल भाः प्रति क्विन्टल ४ हजार भारुं छक्वलं द्वःछि भारु थ्यंगु खः ।

स्वयां न्ह्यः नं छकः भारतय् प्याज उत्पादन म्हो जुयाः प्याजया भाः थहां वंगु खःसा उकिया लिच्वः नेपाःया बजारय् नं लाःगु खः । अबले नेपालय् प्याज प्रति किलो निसः तका स्वयां च्वय् थ्यंगु खः । मोहनि नखःया न्ह्यःने प्याजया भाः थहां वनेवं सर्वसाधारण उपभोक्तायात धाःसा मारय् लाइगु जूगु दु ।