ने. सं. ११४४ कौलाथ्व पारू - नःलास्वनेगु

सडक विस्तारय् हानं संघर्ष

सरकारी भावं मुआब्जा बीगु कुतःया विरोध
येँ – सडक विस्तार पीडित संघर्ष समितिं वइगु झिंन्यान्हु लिपा आन्दोलनया घोषणा यायेगु तयारी यानाच्वंगु खँ सीदुगु दु । संघर्ष समितिया नायः सुमन साय्मिं ‘नेपालभाषा टाइम्स’ लिसे खँ ल्हासें थःपिं हानं आन्दोलनय् वनेत्यनागु खँ कनादिल ।

वय्कलं तःधंगु सघर्षया विकल्प मदु धासें आःया आन्दोलन निर्णायक जुइगु खँ नं कनादीगु दु । सर्वोच्च अदालतं उचित क्षतिपूर्ति बियाः जक सडक विस्तार या धकाः आदेश बीधुंकाः नं उपत्यका सडक विस्तार आयोजनां धाःसा सरकारी भावं जक क्षतिपूर्ति बीगु खँ न्ह्यःने तयाः षडयन्त्र यानाच्वंगु द्वपं बियादिसें आःया आन्दोलन उकिया विरुद्ध केन्द्रित जुइगु खँ नं कनादिल ।

सडक विस्तार विरुद्धया मुद्दा आः अन्तर्राष्ट्रियकरण जुइधुंकूगु खँ कनादिसें वय्कलं धयादिल, ‘सडक विस्तार विरुद्धया आन्दोलन अन्तर्राष्ट्रियकरण जुइधुंकूगु दु, गुकिं यानाः सरकारयात नं समस्या जुयाच्वंगु दु, अथे जुयाः कि आः उपत्यका विकास प्राधिकरण ब्यालेन्सय् वइ कि झीत सिधयेकेगु कुतः याइ ।’

सडक विस्तारया मुद्दा आः अस्तित्व व पहिचानया नं लडाईं जूगु धासें आन्दोलनयात विस्तार यायेगु कथं थःपिंसं तयारी यानाच्वनागु खँ नं वय्कलं कनादिल । थ्वहे झ्वलय् संघर्ष समितिं थःपिनिगु आन्दोलनयात तब्याकेगु निंतिं संघर्ष समितिया केन्द्र विस्तार नं याःगु दु ।

वंगु शनिवाः छगू भेला यासें झिंखुगू थाय्या न्याम्ह न्याम्ह दुथ्याइ कथं केन्द्रीय समिति विस्तार याःगु खः । स्वनिगःन्यंकंया सडक पीडित संघर्ष समितिया दुजःत दुथ्याकेगु कथं तयारी जुयाच्वंगु जानकारी नं वय्कलं बियादिल । स्वनिगलय् जक स्वीनिगू थासय् सडक विस्तार पीडित समिति दुगुली आः मेगु मुँज्या च्वनाः मेथाय् नं विस्तार यायेगु खँ वय्कलं कनादिल ।

अथेहे संघर्ष समितिं नेवाः न्ह्यलुवा, स्थानीय क्लब, संस्थायात नं दुथ्याकेगु तयारी यानाच्वंगु दु । अथेहे स्थानीय लागाय् जुयाच्वंगु सम्पदा न्हंकेगु ज्याया विरुद्ध स्थानीय जनतायात हे सचेत यायेगु तयारी जुयाच्वंगु खँ नं वय्कलं कनादिल ।

पूर्ण पाठ मवयाः चिउताः
सडक विस्तार पीडितया पक्षय् सर्वोच्च अदालतं फैसला यायेधुंकाः नं उकिया पूर्ण पाठ धाःसा आः तकं पित मबिउगु खँय् नं संघर्ष समितिं चिउताः प्वंकूगु दु ।

फैसलाया पूर्ण पाठ पित बीगु ज्याय् ढिलाई जुयाच्वंगुया लिउने मेमेगु हे खँ जकं जुयाच्वन लाकि धकाः नं चिन्तित जुयाच्वंगु दु । कानूनविद्तय्सं धाः कथं फैसलाया पूर्णपाठ मस्वयेकं अदालतं याःगु फैसला गज्याःगु खः धाये फइ मखु ।