ने. सं. ११४३ चौलाथ्व सप्तमी -

फास्ट ट्राय्कय् बुंगद्यःया जग्गा

येँ – फास्ट ट्राय्कय् लाःगु गुथिया जग्गा मुआब्जा गुथि संस्थानं कायेधुंकूसां नं सम्बन्धित गुथियात धाःसा थुकिया जानकारी मदुगु खँ सीदुगु दु । फास्ट ट्राय्कय् बुंगद्यःया रथ दयेकेत जंगलय् सिँ कया हइपिं बोसी गुथिया गुथियार गोपाल महर्जनं ‘नेपालभाषा टाइम्स’ लिसे खँ ल्हायेगु झ्वलय् उगु खँ कनादीगु खः ।

थुगु दँया जात्रा यायेगु निंतिं माःगु सिँ जंगलं हयेधुनागु खँ कनादिसें वय्कलं थःपिंसं जोते यानाच्वनागु २० निसें २२ रोपनी जग्गा फास्ट ट्राय्कय् लाःगु जानकारी बियादिल । गुथि संस्थानं छुं ई न्ह्यः जक थःपिंसं प्यंगू करोड तका मुआब्जा फास्ट ट्रायक आयोजनापाखें कायेधुनागु जानकारी बिउगु खः ।

तर सम्बन्धित गुथितय्त धाःसा थुकिया बारे जानकारी मबिउनि । गुथि संस्थानं गुलि जग्गाया मुआब्जा कायेधुन धइगु खँया जानकारी कायेत संस्थानया प्रवक्ता सरोज थपलियायात स्वापू तयाः न्यनाबलय् वय्कलं म्हिगः बिदाया न्हि जूगुलिं थःके उकिया तथ्यांक मदु धासें उकिया निंतिं थौं अफिस इलय् स्वापू तयेत धयादीगु दु । वय्कलं नं गुथि संस्थानं मुआब्जा कायेधुनागु तर थुलि हे कायेधुन धकाः तत्काल धाये मफुत धासें थौं जक उकिया जानकारी बीगु खँ कनादिल ।

मेखे गुथि संस्थानया जग्गा फास्ट ट्राय्कय् लायेधुंकाः आः थःपिसं ज्याना च्वनागु बुँ मदइगुलिं समस्या जुइ फइगु खँ भाजु महर्जनं कनादिल । आः गुथि संस्थानं मुआब्जा कायेधुंकाः बुंगद्यः जात्राया निंतिं गज्याःगु व्यवस्था याइगु खः धइगु न्ह्यसः तयादिसें थःपिंसं ज्यानाच्वनागु बुँ मदइगु खःसा आः ज्या यायेत नं समस्या जुइगु खँ वय्कलं कनादिल ।

वय्कलं धयादी, ‘जात्रा पर्व ल्यंका तयेमाः तर अथे धकाः छुं हे मदयेक ज्या याये फइ मखु ।’ वय्कलं फास्ट ट्रायकय् लाःगु जग्गाया सट्टाभर्ना जूसां नं जिउगु खँ कनादिसें आः अधिग्रहण जूगु जग्गाया विकल्प मेगु व्यवस्था सरकारं यायेमाःगु माग यानादिल ।