वडा वडाय् कर म्हयेत अनुगमन

यल – स्थानीय कर म्हयेगु निंतिं यल महानगरपालिकां छेँय् छेँय् हे अनुगमन पुचः छ्वयेगु तयारी शुरु याःगु दु । राजश्व प्रशासन प्रमुख दिलराज शाक्यं ‘नेपालभाषा टाइम्स’ यात कनादी कथं यल मनपाया २९ गुलिं हे वडाय् बिस्ंक बिस्कं पुचः दयेकाः छेँय् छेँय् हे अनुगमन याकाः कर म्हयेगु ज्या यायेत्यंगु दु ।

वडाय् अनुगमन वनेगु झ्वलय् कर मपूपिं तःधंपिं करदातायात नं कर पुलेत इनाप यायेगु खँ वय्कलं कनादिल । मनपां कर पुलेत ताकेता याःसां नं आपालं तःधंपिं करदातातय्सं कर पुलेत आनाकानी यानाच्वंगु कारणं थज्याःगु पलाः ल्ह्वनेत्यंगु खः ।
थ्वहे झ्वलय् हिमालय कलेजं थःपिं कर पुलेत तयार दु धकाः मनपायात धयाहःगु खँ राजश्व प्रमुख शाक्यं कनादीगु दु ।

वय्कलं कनादी कथं कर पुले धकाः माःगु फुक्कं भ्वं ज्वनाः कलेजया प्रतिनिधि मनपाय् वःगु खः तर हिसाब यायेधुंकाः ध्यबा मगाःगुलिं लिपा पुले धकाः बचं बियाः लिहां वंगु दु ।

अथे खःसां मेमेपिं तःधंपिं करदातातय्सं धाःसा आः तक नं कर पुलेत स्वापू मतःगु खँ वय्कलं कनादिल । आः वडास्तरीय अनुगमनया झ्वलय् उमित नं कर पुलेत इनाप यायेगु व वयां लिपा नं वेवास्ता यात धाःसा कारबाही यायेगु तयारी जुयाच्वंगु दु ।