ने. सं. ११४४ ञलाथ्व नवमी -

किपुली द्यः लुल

किपू – थनया वडा नं. ६ स्थित चारघरे धाःगु थासय् ल्वहंयागु द्यःया मूर्ति लुया वःगु दु । मूर्तिया आकार व निर्माण शैली स्वयेबलय् थ्व लिच्छवीकालीन द्यः थें खने दुगु खँ किपू नपाया उपमेयर सरश्वती खड्कां कनादिल । अथे खःसां आः पुरातत्व विभागयात क्यनाः जक थुकिया काल निर्धारण याये फइगु खँ नं वय्कलं कनादिल ।
नेवाःतय्सं जालन्धर नं धाइगु उगु थासय् म्हीग छगः देगः ल्ह्वनेगु लागिं गाः म्हूबलय् उगु मूर्ति लुया वःगु खः ।

मूर्ति लुइवं प्रहरी व किपू नगरपालिकायात जानकारी याःगु खः । उपमेयर खड्कां ‘नेपालभाषा टाइम्स’ यात जानकारी बियादी कथं अन मूर्तिया नापनापं लः वनीगु धः, पाल्चा थेंज्याःगु थल नं आपालं लुया वःगु दु । थ्व स्वयेबलय् न्हापा अन छगू पूर्ण वस्ती हे दुगु अनुमान याये फइगु खँ नं वय्कलं कनादिल । थज्याःगु मूर्ति अन थःपिंसं खना धकाः ९० दँ दुपिं स्थानीय वृद्धतय्सं तकं मधाःगु जुयाः थ्व मूर्ति गबले ल्हात धकाः अनुमान याये मफुगु खँ वय्कलं कनादिल ।

किपू नपाया मेयर रमेश महर्जनं किपुली आः तकया दकलय् पुलांगु लिच्छवीकालीन शिलालेख थ्वहे थासय् लुया वःगु जुयाः थ्व थासय् तसकं ऐतिहासिकस्थल जूगु खँ ‘नेपालभाषा टाइम्स’ यात कनादिल । थ्व मूर्ति लुया वःगुलिं थ्व थाय्या महत्व अझ हे थहां वंगु खँ कँसें वय्कलं आः थ्व लुया वःगु मूर्तितय्त संरक्षण यानाः विज्ञत हयाः थप अनुसन्धान याना यंकेगु जानकारी नं बियादिल ।