ने. सं. ११४४ चौलागा अष्टमी -

देउवा बहुदलीय प्रम कि निर्दलीय ?

येँ – प्रधानमन्त्री शेरबहादुर देउवाया नेतृत्वय् गठन जुयाच्वंगु वर्तमान सरकार बहुदलीय खः कि निर्दलीय ? येँ महानगरपालिकाया प्रमुख लिसें नेकपा (एमाले) या नेता विद्यासुन्दर शाक्यं थ्व न्ह्यसः तयादीगु दु । वंगु आइतवाः जूगु छगू सार्वजनिक ज्याझ्वलय् वय्कलं न्हापांखुसी थ्व बिचाः तयादीगु खः । वयां लिपा येँया थीथी दल आवद्ध स्थानीय नेतातय् दथुइ नं थुकियात कयाः चर्चा शुरु जूगु दु ।

म्हीग ‘नेपालभाषा टाइम्स’ लिसे खँ ल्हासें वय्कलं धयादिल, ‘जिं थथे धयाबलय् प्रधानमन्त्री देउवाया विरोध यात धकाः नं मनूतय्सं धया हल । तर जिं प्रधानमन्त्रीया विरोध यानागु मखु । संविधानय् गनं नं निर्दलीय प्रधानमन्त्री दइ धकाः कल्पना तकं याना तःगु मदु । तर देउवायात न्ह्यागु पार्टीया सांसदं भोट बिउसां जिउ धाल, ह्वीप लगे जुइ मखु हं, धायेबलय् वय्कः गय् जुयाः बहुदलीय प्रधानमन्त्री जुल ?’

‘देउवा स्वतन्त्र सांसदया रुपय् प्रधानमन्त्री जुयादीगु खः लाकि कांग्रेसया सभापतिया रुपय् प्रधानमन्त्री जुयादीगु खः ? देउवा प्रधानमन्त्री जूगु खँय् कांग्रेस पार्टीं गौरव याये खनी लाकि मखनी ?’ वय्कलं न्ह्यसः तयादिल ।

थ्व व्यवस्थाय् निर्दलीय प्रधानमन्त्री नं जुइ धकाः संविधानय् च्वयागु खः लाकि मखु धकाः अबलय् संविधान च्वःपिं ध्यानगोविन्द रंजित, गगन थापा थेंज्याःपिं कांग्रेसया सांसदतय्के न्ह्यसः न्यनेमाःगु व वय्कःपिनि लिसः छु जुइ छकः स्वयेमाःगु बिचाः नं वय्कलं तयादिल ।

प्रधानमन्त्री शेरबहादुर देउवाया नियुक्ति निर्दलीय खः लाकि बहुदलीय खः धइगु थ्व राजनीतिक विवाद केन्द्रीयस्तरय् जक कायम जुयाच्वंगु खःसा मेयर शाक्यया थ्व धापू लिपा थुकियात कयाः नगरस्तरय् नं चर्चा शुरु जूगु दु ।