अवार्ड वितरणया लहर

नेपालय् लिपांगु इलय् संकिपा ख्यलय् अवार्ड वितरणया छगू लहर हे वयाच्वंगु खनेदु । नेपाःया संकिपा ख्यःलिसे सम्बन्धित थीथी संघसंस्थां संकिपा सम्बन्धी अवार्ड वितरणया ज्या यानाच्वंगु खनेदु । नेपाली संकिपा अले थुगु ख्यःया कलाकारतय् हकहित व अधिकारया लागि धकाः आपालं थीथी संघसंस्था चायेकातःगु दु । तर थजाःगु संघसस्थातय्सं संकिपा व संकिपा ख्यःया कलाकार व थ्वलिसे सम्बन्धिततय्गु हकहित व अधिकारया लागि ज्या यायेगु स्वयां नं थीथी कथंया अवार्ड इनेगुलिइ हे अप्वः ध्यान केन्द्रीत यानाच्वंगु खनेदु ।

लिपागु इलय् संकिपा ख्यः व कलाकारतय् हक हिट व अधिकारया निंतिं धकाः पलिस्था यानातःगु नेपाल चलचित्र कलाकार संघ (फान)नापं अवार्ड इनेगु थेंज्याःगु ज्याय् लगे जुयाच्वंगु दु । नेपाःया संकिपा उद्योगं लिपांगु इलय् बांलाक ब्यापार यायेफयाच्वंगु मदु । प्रदर्शनय् वःगु अप्वःथें संकिपा नं ब्यापारया ल्याखं असफल जूगु खनेदु । अय्नं नेपाल चलचित्र कलाकार संघलिसें संकिपा ख्यःलिसे सम्बन्धित थज्याःगु आपालं संघसंस्थात संकिपा उद्योगया अवस्थायात कयाः चिन्तनशील जुइगु, थुकिया विकाश व विस्तार यायेगु, संकिपाया गुणस्तर अप्वयेकेगु, नेपाःया संकिपायात अन्तर्राष्ट्रियस्तरय् तक थ्यंकेगु नापं कलाकारतय्हकहित व अधिकारया निंतिं नीतिनियम तर्जुमा यायेगु थेंज्याःगु कार्ययोजना दयकेगु पलेसा अवार्ड बितरण यायेगु हे दकलय् तःधंगु व मुख्य उद्देश्य तायेकाः थज्याःगु ज्याय् तक्यनाच्वंगु खँ संकिपा ख्यलय् थ्व इलय् चर्चा जुयाच्वंगु दु । नेपाल चलचित्र कलाकार संघ थःगु आज्जु स्वयां नं अनावश्यक रुपं मेमेगु ज्याय् तक्यनाच्वन धइगु नं चर्चाय् वयाच्वंगु दु ।

न्हापालिपा स्वयां लिपांगु इलय् वयाः संकिपा सम्बन्धी अवार्ड इनेगु ज्याझ्वलं छगूकथंया व्यापकता हे काःगु खनेदु । संकिपाया अवार्ड इनेगु लागि आपालं हे संघसंस्थात अस्तित्वय् खने दयेकः वयाच्वंगु दु । धायेगु हे खःसा संकिपा व थ्वलिसे सम्बन्धित संघसंस्थातय्सं छुं नं कथंया अवार्ड इनेगु ज्या याइमखु । संकिपाया निंतिं अवार्ड वितरण यायेगु ज्या धइगु ला मनोरञ्जनलिसे स्वापू दुगु संचार संस्था वा अज्याःगु हे छुं इभेन्ट म्यानेजमेन्टं याइगु खः । संसारय् हरेक देय्या संकिपा ख्यःयात स्वयेगु खःसा अवार्ड वितरण ज्या याइगु धइगु संचार माध्यमतय्सं खः । गुगु अप्वःथें देशय् याना वयाच्वंगु नं दु । अथेला नेपालय् संकिपा अवार्ड वितरण यायेगु अप्वःया वयाच्वंगुया छगू कारण नां व दां कमे यायेगु निंतिं हे जक यानाच्वगु खः धकाः नं धायेगु यानाच्वंगु दु । गुलिसिनं ला थुकियात संकिपाया व्यापार यायेगुकथं नं कायेगु यानाच्वंगु दु । उकिं हे नं संकिपा अवार्ड बितरण याइगु संघसंस्थात नं यक्व खने दयाच्वंगु खः । नेपालय् संकिपा ख्यलय् वितरण जुयाच्वंगु छुं छुं अवार्डया नां थुकथं दु ः बक्स अफिस सिने अवार्ड, अन लाइन सिने अवार्ड, ओफा, इनास, नेफ्ता, फान , कामना फिल्म अवार्ड, फिक्सन, इन्फा अवार्ड , राष्टिय चलचित्र अवार्ड आदि ।

कला, संगीत, मनोरञ्जनया ख्यलय् अवार्ड वितरण जुइगु वा थज्याःगु ज्याझ्वः यायेगु धइगु छुं न्हूगु खँ मखये धुंकल । संकिपा ख्यलय् अवार्ड वितरण यायेगु धइगु कलिउड (नेपाल)य् जक मखसे हलिउड–बलिउड लगायत मेमेगु संकिपा ख्यलय् नं यायेगु यानाच्वंगु दु । हलिउडय् ‘ओस्कार अवार्ड’ व बलिउडय् ‘फिल्म फेयर अवार्ड’ यात प्रतिष्ठित अवार्डकथं कायेगु याः । नेपालय् धाःसा थीथी संघसंस्थातय्सं अनेक नामं अवार्ड वितरण यायेगु याना वयाच्वंगु दु । थुकिं यानाः अवार्डया महत्व यात हे क्वकायेगु ज्या याइ । नेपाःया संकिपा ख्यः व संकिपाया बजाःया तुलनाय् अवार्ड वितरणया ज्या अप्वः जुयाच्वंगु खनेदु । उकिसनं लिपांगु इलय् संकिपा सम्बन्धी अवार्ड विदेशय् वनाः यायेगु प्रचलन अप्वःया वयाच्वंगु दु । धायेत धाःसा विदेशय् अवार्ड वितरण थेंज्याःगु ज्याझ्वः यायेगु धइगु बिदेशय् नेपाली संकिपा बजाः प्रबद्र्धन यायेत खः धकाः धाइ ।

संकिपाया अवार्ड धइगु संकिपाकःमिपिंसं संकिपा ख्यलय् व संकिपाय् याःगु ज्याया उत्कृष्टताया आधारय् अझ बांलाक ज्या याये फयेमा धकाः वय्कःपिंसं याःगु ज्याया सम्मानया रुपय् प्रोत्साहन जुइकथं इमिगु हौसला अप्वेकेया निंतिं वितरण याइगु खः । इतिहासयात दुवालाः स्वयेगु खःसा नेपालय् संकिपा सम्बन्धी अवार्डया वितरणया ज्या बि सं २०४३ सालनिसें न्ह्याःगु खः । अथेला नेपालय् संकिपा निर्माणया ज्या न्ह्याःगु धइगु २०२१ सालपाखे निसें खः ।

तर अवार्डया बितरण धाःसा निगू दशक स्वयां लिपा २०४३ सालनिसें जक न्ह्याःगु खः । धायेगु हे खःसा उगु इलय् नेपालय् संकिपाया निर्माण नं तसकं म्हो जक जइगु खः । नेपालय् ४० या दशकनिसें जक संकिपा निर्माणय् तीव्रता वःगु खः। २०४३ सालय् नेपालय् न्हापांखुसी ‘लायन्स क्लब अफ बिशालबजार’ या ग्वसालय् संकिपा ख्यलय् अवार्ड वितरण यायेगु ज्या जूगु खः । न्हापांखुसी जूगु संकिपा अवार्ड वितरण १५गू विधाय् जूगु खः । लिपांगु इलय् वयाः दँय्दसं हे न्हय्गू च्यागू थीथी संघसंस्थां अवार्ड वितरण ज्याझ्वः यायेगु याना वयाच्वंगु दु । संकिपा ख्यलय् थुकथं थीथी संघसंस्थातय्सं थीथी नामं अवार्ढ वितरण यायेगु याना वयाच्वंसां नेपाःया संकिपाया स्तर धाःसा थहां वने फयाच्वंगु मदु । निर्माणलिपा प्रदर्शनय् वःगु गुलिखे संकिपां बांलाक व्यापार नं याये फयाच्वंगु मदु । अवार्ड वितरण यायेवं जक नेपाली संकिपाया ब्यापार बांलाइ, संकिपा स्तरीय जुइ, अले कलाकारतयगु अभिनय क्षमतानं अप्वइ जक मखसे संकिपा हित जुइ, सफल जुइ स्तरिय संकिपा निर्माण जुइधइगु मदुगु जक मखसे छुं ग्यारेन्टी नं मदु ।

थौंकन्हय् अवार्ड वितरणया ज्या याना वयाच्वंगु थीथी संघसंस्थातय्सं मात्र अवार्डया नामय् अवार्ड वितरण यायेगु स्वयां नं नेपाली संकिपाया बजाः प्रबद्र्धन नापं बजाःयात विविधिकरण यानाः नेपाःया संकिपायात बिदेशय् तकं नियमितकथं प्रदर्शन यायेत पहल यायेगु स्वयेमाः । संकिपा व संकिपाकःमितय्ग हकहित व अधिकारया लागि नं छुं उल्लेखनीय ज्या यायेमाःगु अति आवयश्क जू । नां, पद व अवार्डय् जक सिमित जुयाच्वने मजिउ ।