फिफा विश्वकप-२०२६ : गोल्डेन बुट सुनां त्याकी, गुकथं क्वःछी ?
एजेन्सी – उत्तर अमेरिकी देय् मेक्सिको, क्यानाडा व अमेरिकाय् न्ह्यानाच्वंगु २३ औं संस्करणया विश्वकप शुरु जूगु लछि दत । लिसें विश्व फुटबलया महाकुम्भ मेला क्वचाइगु नं ई सतिना वयाच्वंगु दु । विश्वकप फुटबलय् मुख्य रुपं चर्चा उपाधि सुनां त्याकी धइगु खःसा वयां लिपा फुटबल प्रेमीतय् दथुइ अप्वः चर्चा जुइगु विषय् ‘गोल्डेन बुट’ या खः ।
थुगुसी नं उपाधि लिपा गोल्डेन बुट सुनां त्याकी धइगु चर्चा विश्वकपया शुरुंनिसें चर्चा जुया वयाच्वंगु दु । विश्वकप उपाधिया सुनां त्याकी धइगु चर्चा व बहसया दथुइ गोल्डेन बुटया नं उलि चर्चा व बहस जुयाच्वंगु दु ।
विश्वकपया स्वंगू चरणया कासा ल्यं दुगु ई तकया दुने गोल्डेन बुटया निंतिं प्यम्हेसिया नां चर्चाय् दु । गोल्डेन बुटया दावेदार वा चर्चाय् दुपिं प्यम्हमध्ये स्वम्ह कप्तान खः । अर्जेन्टिनाया कप्तान लियोनल मेस्सी, फ्रान्सया कप्तान केलिएन एम्बाप्पे, इंग्ल्याण्डया कप्तान ह्यारी केन व मे म्ह नर्वेया स्टार कासामि एर्लिङ हालान्ड खः ।
प्रिक्वार्टर फाइनल कासा क्वचागु ई तकया दुने अर्जेन्टिनाया कप्तान मेस्सी दकलय् अप्वः च्यागू गोललिसें शीर्ष स्थानय् दुसा फ्रान्सया कप्तान एम्बाप्पे व नर्वेया हालान्ड ७-७ गोललिसें निगूगु थासय् व इंग्ल्याण्डया कप्तान केन ६ गोल यानाः स्वंगूगु थासय् दु ।
मुख्य यानाः कासा ज्वःछिया दुने दकलय् अप्वः गोल याःम्ह कासामियात गोल्डेन बुट बीगु खः । यदि गोल ल्याः बराबर जुल धाःसा फिफाया नियमकथं सुनां दकलय् अप्वः ‘एसिस्ट’ याःगु दु, व स्वइ । यदि गोल ल्याः व एसिस्ट निगुलिं बरfबर जुल धाःसा दकलय् म्हो मैदानय् ई छ्याम्ह कासामियात गोल्डेन बुट बी ।
थ्व ल्याखं आतकया दुने दकलय् अप्वः गोल याःम्ह, एसिस्ट याःम्ह व मैदानय् म्हो ई छ्याःम्हया ल्याखं मेस्सी दकलय् न्ह्यःने लानाच्वंगु दु । मेस्सीं जारी विश्वकपय् दक्वं कासा म्हितूसां ४१० मिनेट जक मैदानय् छ्याःगु दु । गोल, एसिस्ट बराबर जुल धाःसा मैदानय् ई छ्याःगुया ल्याखं मेस्सीयात फाइदा जुइगु अप्वः सम्भावना दु ।
अथे हे साविकया गोल्डेन बुट विजेता फ्रान्सया एम्बाप्पें नं थुगु विश्वकपय् आतक ७ गोल यानातःगु दुसा २ गू एसिस्ट याःगु दु । एम्बाप्पें समूह चरणय् ४ व नकआउटय् ३ गोल याःगु खः ।
न्हापांखुसी विश्वकप म्हिताच्वंम्ह नर्वेया हालान्डं आतकया दुने ७ गोल याःगु दु । हालान्डया थ्व विश्वकपय् छगू तःधंगु उपलब्धि नं खः । हालान्डया गोलया दर नं मेपिं स्वम्ह कासामिया स्वयां उत्कृष्ट जू । थुकथं हे इंग्ल्याण्डया कप्तान केनं ६ गोल यानाः छगू एसिस्ट याःगु दु ।
क्वार्टर फाइनल कासा थौं चान्हसंनिसें शुरु जूगु दु । सेमीफाइनल व फाइनल कासा ल्यं हे दनि । उकिं प्यम्हं कासामिं थःपिनिगु गोल ल्याः अप्वयेकेगु मौका नं उतिकं दु । तर छता खँ गोल्डेन बुटया दावेदारत मेस्सी, एम्बाप्पे व हालान्ड मध्ये छम्ह जक फाइनलय् थ्यंके फइ । छाय्कि थुपिं स्वम्हमध्ये छम्ह कासामिया प्रतिस्पर्धा एम्बाप्पे लिसे जुइ । सुनां थःगु टोली त्याकेत भूमिका म्हिती, वं हे गोल्डेन बुट त्याकेगु सम्भावना अप्वः दइ ।
LEAVE YOUR COMMENTS