अमेरिकां इराकय् थप आक्रमण अप्वयेकीगु

एजेन्सी – अमेरिकां इरानय् आक्रमण अप्वयेकेगु ख्याच्वः बिउगु दु । अमेरिकां आतकया दुने ग्वीगू स्वयां अप्वः थाय्यात लक्षित यानाः आक्रमण याये धुंकूगु दु । अमेरिकी सेनां लगातार निन्हुया दिं (बहनि) नं आक्रमण जारी हे यानातःगु दु ।

अमेरिकी सेनाया केन्द्रीय कमान्ड ‘सेन्टकमं’ थःपिनि सेनां इरानय् याःगु आक्रमणया भिडियोत धमाधम सामाजिक संजाल एक्सय् पोष्ट यानाच्वंगु दु । सेन्टकमं थुपिं आक्रमणया मुख्य उद्देश्य होर्मुज स्ट्रेटय् व्यावसायिक जहाज व निर्दोष नाविकतय्त कयाः इरानं यानाच्वंगु आक्रमण व इमिगु क्षमतायात अझ कमजोर यायेगु खः धकाः नं च्वःगु दु ।

अमेरिकी सेनां एअर डिफेन्स सिस्टमलिसें तटीय निगरानी उपकरण, क्षेप्यास्त्र, ड्रोन स्टोरेज थेंज्याःगु उर्जा केन्द्र व भण्डारणयात निशाना दयेकाः आक्रमण यानाच्वंगु दु । लिसें नौ सेनिक क्षमता व इरानया तटीय क्षेत्रया सैन्य लजिस्टिक ढाँचायात नं निशाना दयेकाच्वंगु दु । सेन्टकमं थुपिं न्हूगु आक्रमणत इरानय् छन्हु न्ह्यः बहनि याःगु सफल व आक्रामक आक्रमण लिपा यानागु धाःगु दु ।

थुखे इस्लामिक रिभोलुसनरी गार्ड कोर्प्सं नं थःगु थासं पुष्टि यासें थःपिंसं चछियंकं कुवेत व बहराइनय् च्वंगु अमेरिकी सैन्य ठेगानायात लक्षित यानाः जवाफी आक्रमण यानागु धाःगु दु ।