आत्मविश्वास गुबलें तंके मज्यू

गुदँ दुबलय् जनबहाःद्यःया न्ह्यःने भजन जुइथाय् भजन हालाः सांगीतिक ख्यलय् पलाः न्ह्याका थौं छम्ह नासलं लिउम्ह व धिसिलाक्क न्ह्यानाच्वंम्ह कलाकार खः–मानकृष्ण वावा ।

इमेज च्यानलं वइगु ख्वताबजि नेवाः टेलिश्रृङखलाय् ‘झूरम्ह खेलाडी’, ‘देपां बी ला’ धयागु डाइलगं मानकृष्णयात अझ लोकंह्वाकाबिल । थ्व डाइलग वलकि मानकृष्णयात सकसिनं लुमंकी ।

मचांनिसें संगीत ख्यलय् नुगः क्वसाःम्ह मानकृष्णया ‘गुलुमरि प्यारामरि’, ‘बुद्ध मिखा’ व ‘सिचु नुगः’ यानाः स्वंगू नेपालभाषाया म्येँचाः व ‘बुद्ध’ नेपाली म्येँचाः पिदने धुंकूगु दुसा मेमेगु आपालं नेपाली म्येँय् वय्कलं संगीत बियादीगु दु । वंगु मंगलवाः तिनि सिलाचः¥हेया लसताय् मानकृष्णया कम्पोज व शब्द अले संगीतय् सनिल तुलाधरया सलय् ‘बम भोले’ म्येँ युट्युबय् रिलिज जूगु दु ।

खास थ्व हे गुरु धइम्ह मदयेक हे संगीत सयेकादीम्ह मानकृष्णं न्हापा छक्वः टेकुइ ‘नाधिनधिना’ नांगु संस्था चायेका संगीत स्यनेगु ज्या यानादीगु खःसा आः बन्द जुयाः विहार विहारय् थीथी थासय् पुचः मुंकाः संगीत स्यनेगु ज्या याना वयाच्वंगु दु । मुख्यतः भोकल, हार्मोनियम व तबला स्यनादीम्ह मानकृष्णयात तबला थायेगु धाःसा भाइसाहु बाः (पवित्र कसाःया बाज्या) व राजु अग्रवालं स्यना बिउगु जुयाच्वन ।

भजन व संगीत ख्यलय् नुगः क्वसाःम्ह मानकृष्ण संकिपा ख्यलय् गथे थ्यन धइगु न्ह्यसलय् धयादी –जि च्यादँ झिदँ दुबलय् झ्वःछेँस्थित बालसेवा स्कुलय् ब्वनाच्वनाबलय् स्कुलय् जूगु छगू ज्याझ्वलय् ‘ग्वंगःखुँ’ नाटक दकलय् न्हापां म्हिता । लिपा जनबहालय्, केलत्वालय् थीथी ज्याझ्वः वा दबू प्याखं जुइबलय् ज्याझ्वः न्ह्यः मनू मुंकेत थीथी नाटक यानाः मनू मुंकेगु ज्या याना । थथे यायां अभिनय पाखे दुहां वया धायेमाल ।’

ख्वताबजिइ थ्यंगु बारे वय्कलं लुमंकादी, ‘पासा सरोज बुद्धाचार्यं ख्वताबजिइ कलाकार माःगुलिं जितः ब्वना यंकल अन जितः सुरेन्द्र तुलाधरं छगू टेस्ट काल । उबलय् जितः ख्वः नं ख्वयेकल, ब्वा नं ब्वाकल, अले सतलय् ग्वारग्वारा नं तुइकल, थुलि याये धुंकाः जि ख्वताबजिया कलाकार जुइत पास जुल । ख्वताबजिया ४३गूगु ब्व ‘अगती’ निसें टेलिभिजन पाखे पलाः न्ह्याकादीम्ह मानकृष्णं थौं तक ख्वताबजिइ म्हिता हे वयाच्वंगु दु । अथेहे नेपालभाषाया झिगू झिंनिगू संकिपाय् म्हिते धुंकूगु दु । वय्कःया मू भूमिका दुगु ‘ग्यानपुस्टाय्ल’ नेपालभाषा संकिपा ख्यलय् तसकं लोकंह्वाःगु संकिपा खः ।

मानकृष्णं नेपालभाषा बाहेक निगू नेपाली संकिपा व छगू टेलिप्याखनय् म्हितादी धुंकूगु दु । तर विडम्बना छु जुयाबिल धाःसा व स्वंगुलिं हे रिलिज जुइमफुनि । ‘जो चोर उसैको ठूलो स्वर’ टेलिश्रृङ्ेखला झिंछगू ब्व तक सुटिङ याये धुंकाः नं टेलिभिजनय् प्रसारण जुइमफुनि । अथेहे ‘बादल’ व ‘प्रगति’ नांगु निगू संकिपा नं रिलिज जुइमफुनि । ‘कर्मय् मदुगु न्ह्याक्व याःसां दइमखु’ धाःथें वय्कलं ज्या याःसां गैरनेवाः भासाय् धाःसा वय्कःया कलकारिता खने दयेकःवयेमफुनि ।

मानकृष्णयात मानकृष्णया नामं स्वयां ‘देय्पां बी ला’ शब्दं आपाः म्हसिउ । उकिं लँय् जुइबलय् फ्यानतय्सं वय्कःयात खनेवं ‘देय्पां बी ला ’धकाः धया हइ । उबलय् मानकृष्णं धयादी, ‘देय्पां मखु दाइ जिं ला जवं बी’ धकाः जव ल्हाः ल्ह्वनाः ‘तारेमाम्’ ।

आर्थिक कारणं आपालं संघर्ष यानादीम्ह मानकृष्णं नेपालभाषा संकिपा व संगीत ख्यः ध्यबाया निंतिं मखसे नेपालभाषा बचे यायेमाः धकाः व थःगु खुबी क्यनेगु निंतिं जक थ्व ख्यलय् पलाः न्ह्याकादीगु खः । थ्व ख्यलय् जीवन पानादीम्ह मानकृष्णं थुकिया निंतिं थःम्हं थौं तकं ब्याहा तकं मयासे याकःचा जीवन हनाच्वनादीगुु दु । आः नं नये खंसां मखंसां थ्व हे ख्यलय् थम्हं जीवन पाना वनेगु धकाः प्रण यानादी ।
थ्व ख्यलय् म्वायेगु आधार दु कि मदु धइगु न्ह्यसलय् मानकृष्णया लिसः दु – म्वायेगु आधार ला नेपालभाषा जक मखु मेमेगु भाषाया संकिपा ख्यलय् नं मदु । वय्कलं अःखबतं न्ह्यसः तयादी, ‘थन सु कालाकारं थःम्हं सन्तुष्ट जुयाः पारिश्रमिक काय् खंगु दु ?’

‘उकिं झीगु ख्यलय् जक मखु मेमेगु भाषाया ख्यलय् नं आधार मदु धाःसां जिउ । बरु बल्ल आः ल्हाः खालि मयायेगु चलन शुरु जूगु दु थ्व बांलागु शुरुवात खः’ वय्कलं धयादी ।

जीवनय् यक्व हे संघर्ष याना न्ह्याःवयाच्वंम्ह मानकृष्णयात मेगु छगू वज्रपात कथं स्वँया छगू तःधंगु ल्वय् जुयाबिल । छेँजःपिंव पासाभाइपिं सकस्यां म्वाइगु आश हे मखने धुंकूगु खःसां मानकृष्णयात धाःसा जितः छुं जुइमखु यदि जिगु म्वायेगु ल्यं दनिसा जि म्वाइ हे तिनि धइगु आत्माविश्वास दयाच्वन । थ्व हे आत्मविश्वासं आः नं ल्वय्नाप संघर्ष यानाच्वनादीगु दु । उकिं मानकृष्ण धापू दु, ‘जीवनय् न्ह्यागुं तंसा थःगु आत्माविश्वास छगू तंके मजिउ । आत्माविश्वास दुसा न्ह्यागु नं असम्भव नं सम्भवय् हिलावनी । कमजोरी धइगु छुकी नं यायेमजिउ ।’

मानकृष्ण ंधयादी – जितः थ्व ल्वय्नाप ल्यायेत आर्थिक रुपं ग्वाहालि यायेत विशेषत ख्वताबजिया डाइरेक्टर सुरेन्द्र तुलाधर नापं त्वाबहाःया पासाभाइपिं, जिं संगीत स्यं वनाच्वंगु थीथी विहार, थीथी ज्ञानमाला भजन खलः, २५ वडा कार्यालय अले मच्छिन्द्र क्लबं तःधंगु भूमिका म्हितूगु दु । वय्कःपिंसं यानाः जि छिकपिनि न्ह्यःने दं वये फयाच्वंगु । आः नं लय्लय् पतिकं चेकअप यानाः नियमित वासः नयाः च्वनागु दु ।

मानकृष्णया सहयोगार्थ सुरेन्द्र तुलाधरया निर्देशनय् ‘लुँया तक्मा’ नांयागु छगू नेपालभाषाया संकिपा दयेके ज्या न्ह्यानाच्वंगु दु । छुं न्हि न्ह्य थ्व संकिपाया शुभमूर्हत वरिष्ठ कलाकारपिं मदनकृष्ण श्रेष्ठ व नीर शाहं यानादीगु खः । थुकिया सुटिङ नं न् याकनं न्ह्यायेत्यंगु खँ वय्कलं कनादीगु दु ।

आः स्वास्थ्य गथे द ुधइगु न्ह्यसलय् वय्कलं धयादी, ‘स्वास्थ्यय् सुधार ला यक्व हे जुल । तर वासः धाःसा नियमित नयाच्वनेमाः । मुख्य वासःया कोटा पुरा जुइ धुंकल आः नर्मल वास हप्ताया निक्वः स्वक्वः नयाच्वनागु दु व लछिया छक्वः चेकअप याना च्वनागु दु ।’

 

 

सम्बन्धित बुखँ

LEAVE YOUR COMMENTS