कलाकार परिषदं कलाकारया हकहितया मुद्दा ल्ह्वनीगु
यल – संकिपा, म्युजिक भिडियो व थीथी ज्याझ्वःलिसें दबुलिइ जुइगु सांस्कृतिक ज्याझ्वलय् थःगु प्रस्तुति बियाः स्वकुमिपिंत मनोरञ्जन बिया वयाच्वंपिं कलाकारतय् हकहितया विषयय् न्हापांखुसी सहलह ब्याकूगु दु । कलाकार परिषदं यलं उकथं मनोरञ्जन बिया वयाच्वंपिं कलाकारतय श्रम शोषण जुयाच्वंगु विषययात कयाः न्हापांखुसी औपचारिक रुपं सहलह ब्याकूगु खः ।
संकिपा, म्युजिक भिडियो व दबुलिइ जुइगु थीथीकथंया सांस्कृतिक व सांगीतिक ज्याझ्वलय् थःगु प्रस्तुति बिया वयाच्वंपिं कलाकारतय्त पारिश्रमिक मबिसे श्रम शोषण यानाच्वंगु खँय् परिषदं उकथं चिउताः प्वंकाः सहलह ब्याकूगु खः ।
शुटिंग व सांस्कृतिक ज्याझ्वलय् वइपिं मेपिंत पारिश्रमिक तत्काल बीगु तर कलाकारयात धाःसा पारिश्रमिक बीगु खँय् वास्ता मयाइगु खँय् तसकं दुःख ताःगुलिं थःपिंसं उकथं सहलह ब्याकागु परिषद्या छम्ह दुजः नापं नांजाःम्ह कलाकार सुरज व्यञ्जनकारं नेपालभाषा टाइम्सयात कनादिल ।
वय्कलं धयादिल, ‘छपु म्येँ रिकर्डिग यायेबलय् बाजं थाइपिं, बासुरी पुइपिं, सितार, गितार धाइपिं वा मेमेगु सहायक बाजं थाइपिं कलाकारयात इमिगु ज्या सिधयेवं निश्चित ध्यबा बियाछ्वइ, दबुलिइ जुइगु ज्याझ्वलय् नं बाजं थाइपिंत तत्काल हे ध्यबा बियाछ्वइ ।
म्युजिक भिडियो व संकिपाया शुटिंग यायेबलय् नं मेकअप आर्टिष्टलिसें लाइट म्यानयात नं उकुन्हुया शुटिंग सिधयेवं हे ध्यबा बियाछ्वइ । तर कलाकारतय्त धाःसा मुक्कं म्युजिक भिडियो व संकिपाया शुटिंग सिधःसां ध्यबा बीगु नां मकाइगु ला खँ त्वःते, ज्या सिधयेका लुमंकेगु तकं याइमखु ।’
नेपालभाषाया कलाकारतय् दथुइ सम्पर्क दयाच्वनीगु थीथीकथंया ज्याझ्वः याना वयाच्वंगु परिषदं आः थुकियात समग्र कलाकारया मुद्दाया रुपय् न्ह्यःने यंकेगु ग्वसाः दुगु वय्कलं कनादिल ।
LEAVE YOUR COMMENTS